مرۆڤ پێش لەدایکبوون، سەر بە هەموو جیهانە، بێ سنوور، بێ ناو و بێ ناسنامە، بەڵام هەر کە چاوی بە رووی ژیاندا هەڵهێنا، جیهان بە هێواشی دەچێتە ناو دڵییەوە و دەبێتە نیشتمان. 
ئەمە تەنیا گۆڕانێکی جەستەیی نییە، بەڵکو وەرچەرخانێکی قووڵی رۆحییە، گەشتێکە لە بێ ریشەییەوە بەرەو ریشەداربوون، لە بێ‌ ناونیشانییەوە بۆ ناسنامە. نیشتمان ئەو هەناسەیەیە کە لەنێوان مێژوو و هەستدا دەچۆڕێتەوە، ئەو خاکەیە کە مرۆڤ لە ئامێز دەگرێت و لەهەمان کاتدا بەرەو ئاسمانی خەیاڵی دەفڕێنێت.
نیشتمان لە گەشتی تەمەندا، رەنگ و مانای دەگۆڕێت، بەڵام جەوهەرەکەی وەک خۆی دەمێنێتەوە. لە ساتەوەختی لەدایکبووندا، لە مەمکی دایکدا چڕ دەبێتەوە، ئەو یەکەمین سەرچاوەی ژیان و ئینتیمایەی مرۆڤ پێی ئاشنا دەبێت. لە قۆناغی منداڵیدا، دەبێتە دەستی باوک، ئەو هێز و دڵنیاییەی ناهێڵێت رەشەبای ژیان بمانلەرزێنێت. 
لە هەرزەکاریدا، دەبێتە عەشقی یار، وەک ئەوەی هەموو جوانیی خاک لە نیگایەکدا کۆبووبێتەوە. کاتێکیش تەمەن هەڵدەکشێت و دەگەینە وێستگەی پیری، نیشتمان دەبێتە کۆکەرەوەی یادەوەرییەکان و ئەو ئاوێنەیەی تێیدا رابردووی خۆمان و نەتەوەکەمانی تێدا دەبینینەوە، تا دواجار لە ساتی ماڵئاواییدا، دەچینە ئەو گۆڕستانە پیرۆزەی وەک ئامێزی دایک، جارێکی تر دەمانگرێتەوە خۆی، بەڵام کوردستان هەر وەک خۆی دەمێنێتەوە.
لە روانگەی فەلسەفەوە، مرۆڤی بێ ریشە، بێ ناسنامەیە. ئەگەر مرۆڤ لە خاکی خۆی داببڕێت، وەک دارێکی بێ ریشەی لێ دێت کە بە کەمترین با دەکەوێت. دانایان فەرموویانە: «ئەو کەسەی مێژووی خۆی نەناسێت، ئایندەشی لەدەستدەدات.» ئەم وتەیە لە کوردستاندا مانایەکی قووڵتر وەردەگرێت، چونکە مێژووی ئەم خاکە تەنیا لە پەڕەی کتێبەکاندا نەنووسراوە، بەڵکو لە دڵی مرۆڤەکان و لەسەر سینگی خاک بە خوێن و خەبات تۆمار کراوە.
بۆ من، نیشتمان تەنیا یادگاریی رابردوو نییە، بەڵکو «ئەوسا و ئێستا و ئایندەیە» و ناوی کوردستانە. ئەم ئینتیمایە لە شار و شاخەکانماندا رەگی داکوتاوە. شاخەکان لای ئێمە تەنیا بەرد و تاشەبەرد نین، بەڵکو شەهادەتی بێدەنگی سەردەمەکان و پاسەوانی شکۆی مێژوون. شارەکانیش، وەک خانەقین، مانیفێستی مانەوەن. خانەقین تەنیا شار نییە، بەڵکو مێژوویەکی زیندووە لەناو خوێنماندا. کاتێک سەیری رووباری ئەڵوەن دەکەیت، تێدەگەیت نیشتمان چۆن دەتوانێت لە جەستەی رووبارێکدا گوزارشت لە بەردەوامی بکات. ئەڵوەن بەو میهرەبانییەی خۆی، چیرۆکی شاخەکان بۆ باخەکان دەگێڕێتەوە، ئەو باخانەی بوونەتە مەڵبەندی ئارامی و داهێنان. ئەمە ئەو فەلسەفەیەیە کە وا دەکات مرۆڤی کورد لە هەر کوێ بێت، دڵی لە کەناری رووبار و لە لووتکەی چیاکاندا لێبدات. 
لە کۆتاییدا، نیشتمان پارچەیەک خاک نییە کە ئێمە خاوەنی بین، بەڵکو ئێمە پارچەیەکین لەو خاکەدا. کوردستان ئەو کارەسات و نەورۆزە هاوبەشەیە کە بەرەو ئایندەیەکی گەش هەنگاو دەنێت. پاراستنی ئەم خاکە و یادەوەرییەکانی، ئەرکێکی ئەخلاقین کە لە ئەستۆی هەموو نەوەکانماندایە.
نیشتمان پارچەیەک خاک نییە کە ئێمە خاوەنی بین، بەڵکو ئێمە خودی ئەو خاکەین.
ئەگەر کوردستان بفەوتێنین، تەنیا شوێنێک لەسەر نەخشە لەدەست نادەین، بەڵکو بەشێک لە دڵی خۆمان لەدەست دەدەین. کوردستان ئەو شوێنەیە کە تێیدا ژیان دەست پێدەکات و لە بیرەوەریدا بەردەوام دەبێت، ئەو خاکەیە کە لە خوێن و یادەوەرییەکاندا دەژی، نەک تەنیا لە سنوور و ناوەڕۆکدا.
پاراستنی کوردستان، پاراستنی خاکێک نییە، پاراستنی مانای بوونە و خزمەتکردنی نیشتمان، خزمەتکردنی مێژووی خۆمانە لە داهاتوودا.
بە کورتی: نیشتمان پێش لەدایکبوون هەموو جیهانە، دوای لەدایکبوون مەمکی دایکە، لە منداڵیدا دەستی باوکە، لە هەرزەکاریدا عەشقی یارە، لە پیریدا یادەوەرییەکانە، لە مردندا گۆڕستانە، بەڵام بۆ من لە هەموو قۆناغەکاندا، هەر کوردستانە.


وتارەکانی نوسەر