لە دوای نسكۆی ساڵی (1975)ی شۆڕشی ئەیلول، داگیركەران وایاندەزانی چرای ئیرادەی بەرخودانی گەلەكەمان بۆ هەمیشە خامۆش بووە، بەڵام 1/6/1976 شۆڕشێكی نوێ، بە ئیرادە و بیر و ستراتیژیەتێكی نوێ و بە رابەرایەتی یەكێتیی نیشتمانیی كوردستان، وەك تیشكێكی رووناك لەناو دڵی شاخە سەركەشەكانی كوردستانەوە درەوشایەوە و هەرزوو بوو بە مەشخەڵێكی بەردەوام و هیوای بۆ نەتەوەكەمان گەڕاندەوە، وەك تاكە شۆڕشی گەلی كوردستان توانی بگاتە ئامانج و بەرهەمی ئەو شۆڕشە قەوارەی ئەمڕۆی هەرێمی كوردستانە.
ئەمڕۆ كە یادی یۆبیلی زێڕینی ئەو شۆڕشە مەزن و بەرهەمدارە دەكەینەوە، تەنیا یادكردنەوەی تێپەڕبوونی (50) ساڵ نییە بەسەر دەستپێكردنی شۆڕشەكەدا، بەڵكو هەڵدانەوەی لاپەڕەی مێژوویەكی زیندووی پڕ لە سەروەری، داستان، نەبەردی، ئیرادە و قوربانیدانە كە دەبێتە وانە بۆ نەوەكانی داهاتوو، بۆئەوەی بتوانین لێیەوە بڕوانینە داهاتووی گەلەكەمان.
شۆڕشی نوێ توانی لە قۆناغی خەباتی شاخدا بە سەركەوتوویی ئەرك و ئامانجەكانی خۆی بپێكێت و خەباتی شاخ و ناوشار پێكەوە گرێ بدات و بەهۆی كۆمەڵێک تایبەتمەندییەوە خۆی لە شۆڕشەكانی دیكە بژاردە و جیابكاتەوە.
یەكەم: شۆڕشێك بوو تەنیا پشتی بە خەباتی چەكداری نەبەست و گرنگییەكی زۆری بە خەباتی هزری، هۆشیاری، دیپلۆماسی و كۆكەرەوەی هەموو چین و توێژەكانی جڤاكی كوردەواریدا، واتە تەنیا هەڵگری دروشمێكی رووتی نەتەوەیی نەبووە.
دووەم: بە سەركردایەتییەكی گەنجی خاوەن بڕوانامەی جۆراوجۆر، بە بیر و هزرێكی پێشكەوتنخواز، چەپ و دیموكراتخواز هاتە مەیدانی خەبات و پشتی بەست بە تیۆری زانستی سیاسی بۆ راڤەكردنی دۆخی ئەو سەردەمەی كۆمەڵگەی كوردەواری بە تایبەتی رابەری شۆڕشی نوێ هەڤاڵ مام جەلال.
سێیەم: لە بواری سەربازیشدا، بەشێك لە سەركردە و فەرماندەكانی ئەزمووندار و دەرچووی كۆلێژی سەربازی بوون، ئەمەش فاكتەرێكی بەهێز بوو بۆ رێكخستنەوە و بە دیسپلینكردنی هێزی پێشمەرگە لە چوارچێوەیەکی رێكخراودا كە بەسەر یەكە جیاوازەكانی ئەو سەردەمەدا دابەشكران، سەرەڕای ئەوەی لە هەر یەكەیەكی پێشمەرگایەتیدا رابەرێكی سیاسی بۆ پەروەردە و پێگەیاندنی پێشمەرگە لەسەر بنەمای هزری و ئەندێشەی سیاسی پەروەردە دەكرا.
چوارەم: تایبەتمەندییەکی دیكەی شۆڕشی نوێ بۆ ئەوە دەگەڕێتەوە لەناو هەناوی شاخ و ئەشكەوتەكانی ناوچە رزگاركراوەكاندا چەندین گۆڤاری تایبەت و رۆژنامە و بڵاوكراوە و نامیلكەی تایبەت لەدایكبوون و گرنگییەكی تایبەت بە لایەنی بڵاوكراوەكان درا شانبەشانی پەیامی ئێزگەی دەنگی گەلی كوردستان.
پێنجەم: لە سایەی ئەو شۆڕشەدا چەندین رێكخراو و كۆمەڵەی تایبەت وەك ژنان، مامۆستایان، نووسەران، هونەرمەندان، خوێندكاران و چین و توێژە جیاوازەكانی دیكە لەدایكبوون، لەبەرئەوە ئەم شۆڕشە سەلماندی، شاخەكان تەنیا بۆ بەرگری و بەكارهێنانی سەنگەر نەبوون، بەڵكو لەناوجەرگەی ئەو شاخانەدا دەنگی پەیڤەكان، دێڕی شیعرە بەرگری و نیشتمانییەكان، ئاوازی سرودە ورەبەخشەكان، وتاری رۆژنامە ئەشكەوتییەكان هاوشێوەی گولـلەی تفەنگی هەڤاڵی پێشمەرگە سنوورەكانی دەبڕی و هیوای دەگەیاندە ناو ماڵەكانی سەرجەم شار و شارۆچكە و گوندەكانی كوردستان.
شەشەم: شۆڕشی نوێ ئەو شۆڕشە بوو كە بە پلانێكی نوێ توانی تاكێكی هۆشیار و پێشمەرگەیەكی خاوەن ئیرادە پێبگەیەنێت، پێشمەرگەیەك كە بزانێت بۆچی و لەپێناو چ ئامانجێكی نیشتمانی و نەتەوایەتی و مرۆڤایەتیدا دەجەنگێت.
بۆیە توانی بگاتە ئامانج و گەورەترین بەرهەم بە دەستبهێنێت كە راپەڕینی ئازاری ساڵی 1991 و لەدایكبوونی قەوارەی سیاسی و دەستووریی هەرێمی كوردستانە. قەوارەیەك كە لەناوجەرگەی نەهامەتییەكانەوە و بە هێزی ئیرادەی ئەم شۆڕشە دروست بووە، لەبەرئەوە یەكێتیی نیشتمانیی كوردستان زیاتر لە هەموو لایەنێك خۆی بە خاوەنی ئەو قەوارە سیاسییە دەزانێت و بەرگری لێدەكات.
بەرز و پیرۆزبێت (51) ساڵەی دامەزراندنی یەكێتی و (50) ساڵەی هەڵگیرسانی شۆڕشی نوێی گەلەكەمان.