کاوە نادر قادر
پێشەکی
دیاردەی ئیسلامی سیاسی کە لەکاتی شکست و روخانی سەلتەنەتی ئیسلامی عوسمانی سەريهەڵداو لە ئاکامی شکستی پڕۆژەی ناسیۆنالستی عه رەبی و رەتکردنەوەی پڕۆژەی بە سیکیولارزمکردنی کۆمەڵگەی ئیسلام، گەشەی سەند بۆ ئەو ئاراستە سلبیەی کە ئێستا ئیسلامی سیاسی پیادا گوزەر دەکات و ئەو قۆناغەی کە هەموو لایەک بە گەورەترین مەترسی ئەو ڕۆژگارەی دادەنێن، جگەلە ئاکام و دەرئەنجام و دەرهاویشتەکانی لەگەڵ جۆری بیرکردنەوەو میکانیزمی کارکردنیان لە نێو کۆمەڵگەی ئیسلامییدا بەو دوایانەش لەگەڵ تەواوی کۆمەڵگەی دونیادا ، بە تایبەتی لە کۆتایی سەدەی بیستەم و سەرەتای سەدەی بیست و یەکدا، پەنا بردنیان بۆ توندوتیژی و تیرۆرکردن و لەزەت وەرگرتن لە کۆمەڵکوژی بە شێوەیەکی هوڤیانەو رەتکردنەوەیان بۆ هەموو پێشکەوتنی زانستی و بە مۆدێرنکردنی کۆمەڵگه، لەوەش زیاتر بە هۆی شۆڕشی ڕاگەیاندن و تەکنەلۆژیا و جیهانگیریدان، ئەو دیاردەیە توانیوویەتی کاریگەرییە سلبییەکانی سنووری جیهانی ئیسلامی ببەزێنێ و لەسەر هەموو دونیا مەترسی هەبێ و بە تایبەت دوای کارەساتەکەی ١١ ئەیلوولی ۲۰۰۱ و جاردانی شەڕی سەرانسەری دژەتیرۆر لەلایەن ئەمریکا و زۆربەی وڵاتانی ئەوروپادا کە هەندێک بە چوارەم شەڕی گەورەی دونیای ناوزەد دەکەن، کاریگەری زۆری کردۆتە سەرپێگەو پەیوەندی و بگرە ئاسایشی وڵاتانی ئیسلامی، ئەوەندەی بەو کارە ئیسلامیان ئەزیەت داوە، شیری خاچپەرستەکان ئەوەندەی ئەزیەت نەداوه، بۆیە پێویستە بەپێی میتۆدێکی زانستی و بە جۆرێکی بابەتیانەو لەڕێگای دیالۆگ و لێکتر حالی بوون هەڵوەستە لەسەر ئەو دیاردەیە بکڕێ ئەو سەرکێشیەی کە ئەو باڵە هەرە توندڕەوەی ئیسلامی سیاسی لەدونیای ئهمڕۆدا ئهنجامی دەدەن، بزانرێ چ کارهسات بەسەر گەلەکانیان دادەهێنن، بۆیە پێویستە نەك تە نیا وە ك دیاردەیەكی سیاسی رووت لێك بدرێتەوە!!!، بەڵكوو وەک مەسەلەیەكی چارەنووسسازی هەنووکەیی و ستراتیژی بۆ ئارامی و گرێبەستی کۆمەڵایەتی ناوخۆی و پەیوەندە نێودەوڵەتییەکان لەبەر چاو بگیرێت، بە تایبەتی بۆ گەلێکی بن دەستی نیشتمان داگیرو دابەشکراوی وەک کوردستان، کە ناکۆکی سەرەکی لەگەڵ داگیرکەرانەو لەخەباتدایە بۆ قەوارەیەکی سیاسی سەربە خۆی کوردستانی نە ک کار بۆ گۆڕانکاری سیاسی وکۆمەڵایەتی ناوخۆیی و دامەزراندنی خیلافەتی ئیسلامی، گواستنەوەی ئەو ناکۆکییە بۆ نێوخۆی کۆمەڵگەی کوردستانیدا، دیاردەیەکی یەکجار سلبی لێ دەکەوێتەوە بەتایبەتی داگیرکەرانی کوردستان بە بەرنامە و ئەجیندای تایبەت هاوکاری ئەو رەوتەدەکەن لە روی فیکری و مادیی و مۆڕالییەوە بۆ بێ هێزکردنی جولانەوەی نیشتمانی کوردستانی و هەستی نەتەوەیی و نیشتمانی کوردستانی و ناسیۆنالیزمی ئەو نەتەوەسەر دەستانەی وڵاتانی داگیرکەری کوردستان کە ئیسلام بەتوخمێکی سەرەکی ئایدۆلۆژیەتی جولانەوەی نەتەوەیی خۆیان دادەنین و کە لەڕاستیشدا ئەو جولانەوانەو دەزگا تایبەتانەی سەر بەو وڵاتەداگیرکەرانەی کوردستان لەهەوڵی ئەوەدان نەتەوەکانی ژێر دەستیان بە هەموو شێوەیەک لەناو نەتەوەی خۆیاندا بتاوێنەوەو باشترین ڕێگاش بۆ ئەو مەبەستە ئایینی ئیسلامەو یەکێک لەکارەکانی کە ئیسلامی سیاسی لەکوردستان دەکات لەو ڕێگایەوە شێواندنی ناسنامەی جوگرافی نیشتمانی و ڕۆشنبیری و کەلتووری و ئینتماییە لەکوردستانییەتەوە بۆ چەمکی ئوممەی ئیسلامی بێ پێگەو شوێنی دیاریکراو بۆ کوردستان لەناو ئەو چەمکەدا، کە تیایدا زالبوونی کەلتوورو ئینتما بۆ عارەب تیایدا حاشاهەڵنەگره، یانی ئیسلامی سیاسی لە کوردستان پڕۆژەیەکی نەتەوەیی سەربەخۆ بەخوێندنەوە و فیکری سیاسی ئیسلامی بنیادکراوی کوردستان لەبەردەست نییە و هاونەتەوەییان زۆر لاوازترە لەهاوعەقیدەییان ، لە راستیشدا ئەرکی سەرەکی ئەو رەوتە لەوەدایه، لەلایەک دۆزی کوردستانی و مەینەتیەکانی گەلی کوردستان بە دونیای ئیسلام بناسێنێ و دۆست بۆ دۆزی کوردستان لە ناویاندا پەیدا بکات، لەلای دیکە فەتوای شەرعی دەرکەن کە گەلی کوردستان گەلێکی مەزڵومەو مافی خۆیەتی وە ك هەر گەلێکی دیکەی سەر ڕووی زەمین بە ڕزگاری وڵات و سەربەخۆی خۆی شاد بێ وە ك م. عەلی باپیر گوتەنی بۆ هەر "کۆیلەو بن دەستی مرۆڤ و نەتەوەی دیکە بێت"، ئەو جۆرە تەفکیرانەی کە ئێستا ئیسلامی سیاسی لە کوردستان بینای سیاسەتی خۆیانی لەسەر دەکەن، بە جۆرێک لە، جۆرەکان بەرهەم و زادەی ئەجیندای ناسیۆنالیزمی نەتەوە سەردەستەکانی وڵاتانی داگیرکەری کوردستانە بۆ گەمارۆدانی جولانەوەی نیشتمانی دیموکراسی کوردستانی و ڕێگری لەئازادی سەربەخۆیی کوردستانیان دەکات، بۆیە ئەو ئاراستە سیاسییەی بەو جۆرەکار دەکات، بە بەردەوام بە ئاگا و بێ ئاگا، دەبێتە ئەسیری سیاسەت و فیکری ئەو پڕۆژە دەرەکییەی ناحەزانی کوردستانیان و ڕووبەڕووی هێزە ناسیۆنالیزم و دیموکراتخوازەکانی کوردستان دەبێتەوە، بۆیە بۆ کوردستانیان پێویستە بەپێی بەرنامەیەکی نەتەوەیی و نیشتمانی، ڕەهەندەکان و پان و بەرینی ئەو پڕۆژەیە ئەنتی کوردستانییە لێک بدرێتەوه، گەلی کوردستان لەئاکام و دەرهاویشتەکانی سیاسی و فیکری و کەلتووری ئەو ڕەوتە سیاسییە هۆشیار بکرێنەوه، ئەوەی دەخوازێ کار بکاو وە ك هێزێکی سیاسی کوردستانی بێت لەلایەک دەبێ خوێندنەوەی کوردانەی بۆ ئیسلام هە بێ و لەلای دیکە بە فلتەری ئەوەدا رەتببێ کە ئامانجەکانی بەئاراستەی پڕۆژەو ستراتیژیەتی کوردستانییەوە گوزەر بکات، ڕەنگە ئەو ڕەوتە ئەوە بە مەحاڵ بزانن، ئەی بۆ کۆماری ئیسلامی ئێران و ئاکەپەی دەسەڵاتداری ئێستای تورکیا و عارەبستانی سعودی لەنیشتمانپارێزیوە دەڕوانە ئیسلام و حزب اللەی لوبنانی و حەماسی فەلەستینی و هێزەئیسلامییەکانی شیشان و کەشمیر لەپێشەوەی سەنگەردان لەدژی داگیرکەرانی وڵاتەکانیان! بەهەند هەڵنەگرتن و چاولێنوقاندن لەو مەسەلانە بەکەم تەرخەمی نیشتمانی لێک دەدرێتەوه .
ئەم پەرتووکەی بەردەستی ئێوەی بەڕێز کە لەماوەی شەش ساڵەوە بە پچڕ پچڕی و بە بێنەوە نووسراوه، هەوڵێکە بۆ ڕادەبڕین لەسەر ماهیەتی ئەو ڕەوتەو لێکدانەوەی هەندێ لەڕەفتارەسیاسییەکانیان لەسەر داهاتوو و چارەنووسی گەلی کوردستان و گۆڕینی فۆڕمی کوردستانی بوون بە فۆڕمی ئوممەی ئیسلامی و دروستکردنی دوو بەرەکی لەنێوان ئایین و ئایینزاکانی کوردستان و کە بە ئاشکرا هەندێکیان فەتوای شەرعی دەردەکەن و پەرە بە بینای فیکری سیاسیان دەدەن بۆ دژایەتی ستراتیژیەتی کوردستانی بوون و بەداهێنانی ڕۆژئاواو جولەکەی دادەنێن و لەلای دیکە چەک هەڵدەگرن دژ بە دەستکەوتە نیشتمانییەکانی گەلی کوردستان، تەنانەت سەرهەڵدانی ئەو ڕەوتە سیاسییە، لەوە نەوەستاوه، وەک بەرنامەیەکی سیاسی بێتە مەیدان، بەڵکوو چەندین گرووپی توندڕەوی بەرهەمهێناوە لەلایەک بە شێوەی سیاسی دەست بەسەر دەزگاکانی کوردستانی دابگرن و بە فتوای شەرعی تواناو پێگەی ئیداری خۆماڵی کوردستانی لاواز بکەن و لەلایەکی دیکە بە کاری توندوتیژی و تیرۆردا، دەسەڵاتی کوردستانی بروخێنن!!!، دەستیان لەگەڵ داگیرکەران و دوژمنە سەرسەخت و باوەکوژەکانی کوردستانی تێکەڵ کردووەو هەندێکیان داگیرکەران و ناحەزانی دۆزی کوردستان ئاراستەیان دەکەن و هەندێکی دیکەشیان لەدوای روخانی ڕژێمی سەدام حوسێنی گۆڕبەگۆڕ، بوونەتە بەشێک لەپڕۆژەی داگیرکاری و ئامرازی دەستی باوەکوژی گەلی کوردستاندا. بۆیە ناساندن و جۆری بەرنامەو پڕۆژەو جۆری بیرکردنەوەیان، بە پێویست دەزانرێ ئهگهر چی هیچ کارێک بەبێ کە م و کوڕی و کورتی نابێ و ناتوانرێ هە موو مەبەستەکان سە د لەسە د بپێکی، لەگەڵ ئەوەشدا، ئومێدەوارین کارەکەمان کرد بێ و بەر ماندووبوونە خاکیەکهمان کەوتبێ، ئومێدەواریشم ئەو مەسەلانە دیالۆک و خوێندنەوەی پتری لەسەر بکرێتە لەهەموو لایەکدا !!؟.
کاوە نادر قادر
هەولێر _کوردستان ٢٣-١٠-٢٠١٢
سەرەتای سەرهەڵدانی بیری ئیخوان لە باشووری کوردستاندا
دوای دامەزراندنی ئیخوان موسلمین لەمیسر لەساڵی ۱۹۲۸ لەسەر دەستی حەسەن بەنا و جێخۆکردنەوەیان لەنێو کۆمەڵگەی میسر، هەوڵیاندا ئەو بیروباوەڕە لەنێو وڵاتانی عارەبی و ئیسلامیدا بڵاوبکەنەوە، هەر بۆ ئەو مەبەستە لەپێش هەڵگیرسانی دووەمین شەڕی گەورەی دونیا، هەوڵییاندا چەندین کەس بنێرنە ئەو وڵاتانه. ئهوانەی گەیشتنە عێراق، کاریگەرییان لەسەر باشووری کوردستانیش هەبوو، یەکەم شاندی ئیخوان بۆ مەبەستی بڵاوکردنەوەی بیروباوەڕی ئیخوان لەسەرەتای ۱۹٤۰ کۆمەڵێک مامۆستای میسری هاتنە عێراق، لەناویاندا شێخ ئەحمەد لەناوچەی بەسرا و زوبەیر کەوتە بڵاوکردنەوەی ئەو بیروباوەڕه، بە هەمان شێوە ساڵی ۱۹٤۲ لەسەر ڕاسپاردەی سەرکردایەتی ئیخوان (حوسێن کەمالەدین و محەمەد عەبدولحەمید ئەحمەد هاتنە عێراق تا بیروباوەڕی ئیخوان بڵاوبکەنەوە).
یەکێکی دیکەکە ناوی ئەحمەد کامیل متوفی بوو لەموسڵ نیشتەجێ بوو، هانی لاوانی دەدا بۆ خەبات و فیکری ئیخوان، کەناڵێکی دیکەی بڵاوبوونەوەی ئیخوان ئەو خوێندکارانەبوون کەوا چووبوونە میسر و ئەزهەر و لەوی لەگەڵ بیری ئیخوان ئاشناییان پەیدا کرد و بە هاتنەوەیان بۆ زێدی خۆیان، ئەو بیروباوەڕەیان بڵاودەکردەوه، بە تایبەتی ئەوانەی کە دەکەوتنە ژێر کاریگەری ئەو بیروباوەڕه، یەکێ لەو خوێندکارانە (مەحموود سەواف) بوو، ناوبراو خەڵکی شاری موسڵ بوو، بە بیروباوەڕی ئیخوان ئاشنایی پەیدا کرد، بە گەڕانەوەی بۆ عێراق بە هۆی شەڕی دووەمی جیهانی گەڕایەوە موسڵ و ویسی بە هاوکاری عەبدولڕەحمان سەعید مەحموودو عەبدولڕەحمان مەحموود ئەلڕەحیم کە دوو بازرگانی گەورەی موسڵ بوون لقێکی ئیخوانی بکاتەوە، بەڵام حکومەت داواکەی ڕەتکردەوە.
دوای گەڕانەوەی سەواف بۆ میسر چاوی بە حەسەن بەنا کەوت لەساڵی ١٩٤٦، زۆر کەوتە دڵی و دوای گەڕانەوەی بۆ جاری دووەم هەوڵی دا لەڕێگای شێخ ئەحمەد زەهاوی پەیوەندی بە باشووری کوردستان بکات و ئەو بیروباوەڕەی تیادا بڵاوبکاتەوە، بۆیە ئەگەر ساڵانی نێوان هەردوو شەڕی گەورەی دونیا، هەوڵیدابێ لیرە و لەوێ بیروباوەڕی ئیخوان بڵاوبکاتەوە، بەڵام لەدوای جەنگی دووەم ئەو بیروباوەڕە هاتە کوردستان لەڕێگای ئەو کۆمەڵ و دەستانەی دروست دەکران لەعێراق و لقیش لەکوردستان دەکرایەوە وەک (کۆمەڵەی ئادابی ئیسلامی ١٩٤٦ و کۆمەڵەی برایەتی موسڵمانان لەئەیلوولی ١٩٤٩) ئەو حاجییە موسڵاویانەی کە ساڵی ١٩٤٦ چاویان بە حەسەن بەنا کەوتبوو لە مەککە، کە لەحەج هاتنەوە، ئەوانیش لەڕێگای خۆیان پەیوەندییان بە هەندێ لەخەڵکی شارەکانی باشووری کوردستان کردووە (مەلا عەبدوڵڵا محەمەد ئەربیلی و محەمەد یاسین شنگالی و هاشم عەبدولسەلام) کە سێ زانای کوردی شاری موسڵ بوون لەبڵندگۆی مزگەوتەکان بیری ئیخوانیان بڵاودەکردەوەو چالاکیان هەڵدەسوڕاند.
لە ٢٦/١١/١٩٤٧ لەڕێگای مەلا حوسێن پیسکەندی لقێکی (کۆمەڵەی ئادابی ئیسلامی) لەسلێمانی کردۆتەوە هەروەها لەکەرکوکیش لقی کردەوە.
کۆمەڵەی برایەتی موسڵمانان سەرۆکەکەی (سەواف) بوو، کە ڕوویەکی ڕاستەوخۆی ئیخوان بوو، ئەم کۆمەڵەیە هەر لەسەرەتاوە ژمارەیەک لەخوێندکارانی کوردی کەوتە ناو (نیزامەدیین عەبدولحەمید، موحسین عەبدولحەمید، ئەحمەد نەجمەدین بەرزنجی، سوبحی داودی، نورەدیین واعیز).
ئەمانە تەواویان خەڵکی کەرکوک بوون.
کەناڵێکی دیکەی (سەواف) بۆ بڵاوکردنەوەی ئیخوان سەردانیکردنی کەسایەتییە ئایینی و کۆمەڵایەتییەکانی باشووری کوردستان بوو، هەر بۆیە بۆ ئەو ئامانجە بە هاوکاری ئەمجەد زەهاوی، سەواف سەردانی ژەنگال و دهۆک و زاخۆ و ئاکرێی کرد لەشوباتی ١٩٥٣دا .
"لەئەیلوولی ١٩٥٤ سەردانی دهۆک و زاخۆ و رواندز و چۆمان و بامەڕنی و چەندین شاری دیکەی باشووری کوردستانی کردبوو، بە هەمان شێوە ساڵی ١٩٥٤ سەردانی شاری هەڵەبجەی کرد و لە مزگەوتی پاشا وتارێکی بە حەماسی خوێندەوە و لەوێوە چاوی بە مەلا عوسمان عەبدولعەزیز و مەلا ساڵح کەریم (مەلا ساڵحی گەورە) و لە هەولێر هەر یەک لە (محەمەد صادق موختار و عەبدولوەهاب حاجی حەسەن و ئەحمەد عەباس و سەید محەمەد جەباری) کەوت.
ئیخوانەکان هەوڵیاندا لە ڕێگای ئەو کۆمەڵەیەی چالاکی خۆیان و بڵاوکراوەکانی ئیخوانی میسر لە شارەکانی باشوور بڵاوبکەنەوە و دوای ڕاوەستانی و ڕاگرتنی چالاکی ئەو کۆمەڵەیە، زۆربەیان بە نهێنی درێژەیان بە خەباتی خۆیاندا، بەڵام ڕاگرتنی بە فەرمی چالاکی ئەو کۆمەڵەیە، وای لێ کردن چالاکییەکان تەنیا لە چوارچێوەی فیکری بێ.
لێرەدا پێویستە ئەوە بگوترێ ئەگەر چی چەندین کەسایەتی و زانای ئایینی کوردستانی ببوونە ئەندامی ئەو کۆمەڵەیە، بەڵام ئەوە ناگەیەنێ کە ئەو کوردانە کەوتبوونە ژێر کاریگەری ئیخوان، یاخود بە هۆی بیروباوەڕی ئیخوان ببنە ئەندامی ئەو کۆمەڵانه، بەڵام ناکرێ نوکڵی لەوە بکرێ دامەزرێنەری ئەو کۆمەڵانە خۆیان ئیخوان بوون و هەوڵیان دەدا بیری ئیخوان بڵاوبکەنەوە.
هەر لەساڵی ١٩٤٧ حاجی سولەیمان یەکەم کەس بوو لە کەرکوک پەیوەندی ڕاستەوخۆی بە ئیخوانەکانی عێراق هەبووە، واش مەزەندە دەکرێ کە لە سەرەتای پەنجاکان لە کەرکوک نزیکەی ٣٠-٣٥ ئەندامی چالاکی هەبووێ.
لە هەولێر (محەمەد صادق موختار و عەبدولوەهاب حاجی حەسەن و ئەحمەد عەباس و سەید محەمەد باری و حاجی خەلیل) ئەندامی ئیخوان بوون.
حاجی تەها حەسەن شنگالی یەکێک بووە لەو کوردانەی کە لە سەرەتای گەڕانەوەی سەواف بۆ عێراق بۆتە ئەندامی ئیخوان و لە بیرەوەرییەکانی خۆیدا باس لەوە دەکات ساڵی ١٩٤٩ سەواف بە یاوەری مستەفا پێنجوێنی و غانم حمودات گەشتیان بۆ ناوچەی سنجار و دەوروبەری کردووەو پێکەوە چوونەتە گوندەکانی قایوسی و گرێ گواراو خێسی و کون ڕوڤی و بلیچ ئەبوسی و حەمێ.
لە کاتی بڕیاری دابەشکردنی فەلەستین ساڵی ١٩٤٨، ئیخوانەکانی هەولێر خۆپیشاندانیان ئەنجام دا و چەندین دروشمی پشتیگیرییان بۆ فەلەستین بەرزکردەوە (عەبدولوەهاب حاجی حەسەن و ئەکرەم شاکر و زێوەر خەتاب و موحمەد صادق موختار و عەبدوڵڵا سەلیم) بەشدارییان تیادا کردوە.
گرنگترین حزبە ئیسلامییەکان
١-بزوتنەوەی ئیسلامی لە کوردستانی عێراق
ئەم بزوتنەوەیە درێژەپێدەری بزوتنەوەی پەیوەندی ئیسلامییە لە کوردستانی عێراق کە ساڵی ١٩٨٧ لە ڕۆژهەڵاتی کوردستان ڕاگەیەندرا، ئەوەبوو دوای ئەوەی کۆمەڵێک لەزانایانی ئیسلامی پەناهەندەی ئێران لە ٢٤/٥/١٩٨٧ بەیاننامەیەکیان لە ئێران بڵاوکردەوە و شۆڕشی چەکدارییان ڕاگەیاند و ئەوکات تاکە هێزی ئیسلامی باوەڕی بە شۆڕشی چەکداری هەبوو، بزوتنەوەی پەیوەندی ئیسلامی لەکوردستان بوو کە ڕابەرەکەی شێخ عەبدول لەتیف واژەیی بوو، هەر زوو ئەو بزوتنەوەیە پێشوازی لە بەیاننامەکە و ئەو کۆمەڵە زانا ئایینییانە کردو لە حوزەیرانی ١٩٨٧ لەشاری سنەی ڕۆژهەڵاتی کوردستان لە ماڵی مەلا محەمەد بەرزنجی کۆبوونەوە و بڕیاردرا ناوی بزوتنەوەی پەیوەندی ئیسلامی بگۆڕدرێ بۆ بزوتنەوەی ئیسلامی و شێخ عوسمان عەبدولعەزیزیش بکرێتە ڕابەر لە شوێنی عەبدول لەتیف واژەیی و مەکتەبێکی سیاسی نوێ هەڵبژێردرێ و چەند هێزێکی سەربازی دامەزرێنێ. ئیتر هێزی سەربازی بزوتنەوە بە لەشکری ئیسلام ناسێنرا، ئەگەر چی ڕاگەیاندنی بزوتنەوەی ئیسلامی گۆڕانکارییەکی ئیمانیانەو سەرەتای قۆناغێکی نوێ بوون بۆ ڕەوتی ئیسلامی لەگەڵ ئەوەشدا هەر لەسەرەتاوە کۆمەڵێک ناکۆکی لەنێو هەناوی خۆی هەبوون، جارێ لەلایەک زۆربەی سەرکردایەتی و مەکتەبی سیاسی و شورای بزوتنەوە پیاوی ئایین بوون، دوور بوون لەکاری سیاسی و دیپلۆماسی. جۆری پەروەردەو بیرکردنەوەیان لەگەڵ یەکدا جودا بوو ئەوەی کۆیکردبوونەوە ئاراستەی ئیسلامی و چەوسانەوەی بەعس بوو، بۆیە لە بوارى سیاسی کرچوکاڵی هەبوو و سەرهەڵدانی ناکۆکی نێوانیان هەر زوو سەری هەڵدا، تەنانەت هەڵبژاردنی شێخ عوسمان عەبدولعەزیزیش لەبەرئەوەی لەلایەن زۆربەیان جێگای ڕێز بوو، پیاوێکی خواناس و شەرعزان بوو، پیاوێکی سیاسی نەبوو، کەم ئەزموون بوو لەو بوارەدا ڕێزگرتنی لەلایەن هەردوو لایەک کردی بە ڕابەر نەک لێوەشاوەیی لەبواری سیاسییدا، نەریتی ئایینی بوو، نەک لەسەر بنەمای پرنسیپی حیزب.
دەربارەی ئەم کتێبە؛
نووسینی: کاوە نادر قادر
بڵاوکراوەکانی ئەکادیمیای هۆشیاری و پێگەیاندنی کادیران - سلێمانی - ٢٠١٤
ژمارەی سپاردنی بەڕێوەبەرایەتی گشتی کتێبخانەگشتییەکان (٢٠٠٩) ساڵی ٢٠١٣
دیزاین و بەرگ: بڕوا عوسمان
زنجیره: (٥٢٢)
سەرپەرشتیاری زنجیرەی کتێب
عوسمان حەمەڕەشید گورون
بابەتی زیاتر