کتێبی شەهیدانی یەکی شوبات
 یەکێکە لە بڵاوکراوەکانی مەکتەبی بیر و هۆشیاری یەکێتیی نیشتمانیی کوردستان کە لەساڵی ٢٠٠٤ بەچاپ گەیەندراوە.
لە کتێبەکەدا باسی ئەو شەهیدانە دەکات کە ڕۆڵەی هەڵکەوتووی گەلەکەیان بوون، خەباتگێڕی کۆڵنەدەر و ژیر و هۆشیاری حزبەکانیان و کوردایەتی و ڕێگای ڕزگاری و دیموکراسیی عێراق بوون. 
خوێنی پاکی لە خوتو خۆڕایی ڕژێندراویان بڵێسەی خەباتەکەی گەلەکەیانی گەیاندووەتە ئاسمان و داری ڕزگاری و دیموکراسیی عێراقی هێنایە بەر. تیرۆریستە پیاوکوژەکانیش بە تەواوی سووک و ڕیسوا کرد و ڕووی ڕەشی دزیویان وەکو کورد کوژ بۆ خەڵکەکەمان ئاشکرا بوو پەردەی لەسەر لابردرا. ئیتر ئەنساری ئیسلام نین لای هیچ کەسێک، ئەنساری زەندەقە و دژ بە ئیسلامن. قاعیدەی ئایین نین بەڵکو قاعیدەی فەساد و فیتنەی خیانەتی دین و دنیا و گەلانن.
 
پێشەکی:    
لە یەکەم ڕۆژی جەژنی قوربانی پیرۆز، لە کاتێکدا هەڤاڵانی مەڵبەند وەکو نەریتێکی کوردانە و یەکێتییانە لە پێشوازی کۆمەڵانی خەڵکی شاری هەولێر، بۆ پیرۆزبایی جەژن و گەردن ئازادی وەستابوون، ئا لەو کاتەدا تیرۆریستێکی خۆکوژ، بە عەقڵیەتێکی ژەنگ گرتووی سەردەمی بەردین کە خۆی و ئەوانەی لە پشتیەوەن دژ بە هەموو بەها جوانەکانی مرۆڤن و چاویان بە ڕەوتی دیموکراسی و بەره و پێش چوونی کۆمەڵ هەڵنایەت، هەلی ئەم مەراسیمەی قۆستەوە و خۆی کرد بە هۆڵی پێشوازی کردن دا لە مەڵبەند، لە کاتژمێر( 10:50 )خولەکی سەرلەبەیانی لە کردەوەیەکی تیرۆریستانەی خۆکوژیدا پۆلێک کادیر و ئەندام و پێشمەرگەی مەڵبەندەکەمانی شەهید و بریندار کرد.  
ڕاستە (ی.ن.ک) وەکو ڕێکخراوێکی شۆڕشگێڕی بەرەنگاری و هەڵسانەوە لە پێناو بزاوی ڕزگاری خوازی گەلەکەمان بە درێژایی مێژووی پڕ لە سەروەری تێکۆشانی دا دە یان سەرکردە و کادیری کردووەتە قوربانی و لە پێناوی سەرخستنی پرۆسەی ئازادی و دیموکراسی و مافی چارەنووس لە ڕۆژگارە سەخت و دژوارەکانی ڕووبەڕووبوونەوەی ڕژێمی دیکتاتۆری بەعس گۆڕ بە گۆڕ، کیمیاباران و سوتماک کردنی کوردستان و ئەنفالە بەدناوەکان نووچی پێ نەدا هەرگیز ئیمڕۆش تیرۆریستان کە لە سەرتاسەری جیهان ڕیسوا بوونیە و کونە مشکیان لێ بوویته قەیسەری ناتوانن پێش بە ئیرادە و خواستی پۆڵاینی ئەم ڕەوتە بگرن لە پێناو مەدەنیەت و عەقلانیەت.
 بۆ شەهیدانی جەژنی قوربان  ،دەبا بە دڵنیایی سەر بنێنەوە
لە یەکیک لەو پەیامانەی لە کتێبەکەدا بلاوکراوەتەوە  سەرۆک مام جەلال بەم شێوەیە باس لە شەهیدانی یەکی شوبات دەکات:   
شەهیدانی نەمری ڕۆژی 1ی شوباتی ئەمساڵ، شەهیدانی دەستی چەپەڵی تیرۆر و کورد کوژی و خوانەناسین، هەروەك شەهیدانی نەمر ڕێگای ڕزگاری و دیموکراسی عێراق و کوردستانن و شەهیدانی نەمری شارە دێرینەکەی کوردستانیش/ شاری هەولێریشە.   
بکوژان تیرۆریستی فریو دراون بە درۆ و دەلەسەکانی تاوانباری جیهانی ئوسامە بن لادن و دار و دەستە خوێن ڕێژەکەی. بکوژان - خۆکوژان - مەست و سەرخۆشی تلیاکی پڕ و پاگەندە ژەهراویەکەی قاعیدەن، پڕ و پاگەندەی خۆ بە کوشتدان بۆ هەڵفرین بۆ بەهەشتی بەرین. کەچی دینی پیرۆزی ئیسلام خۆ کوشتنی بە تاوانی کوشتن داناوە، موسڵمان کوشتنێکی لە خۆت و خۆڕایی وەکو کوشتنی هەمووان تاوانبار کردووە و بکوژ شوێنەکەی ناوەڕاستی دۆزەخە و بێ بەری لە هەموو سەرەتاکانی ئیسلام، وەکو زەندیق و خوانەناس و لە دین هەڵگەڕاوە، ئازاری دۆزەخ دەچێژێ.
بکوژان - خۆکوژان - وا گێل و گەوج کراون، وا سەریان لێ شێوێندراوە، وا بە تلیاکی درۆ و دەلەسەی ژەهراوی زەندیقەکان فرچک (گۆش) دراون کە ئیتر لە مرۆڤایەتی شۆراون، بوونەتە جانەوەری دڕندە و هار و هاج بەردراونەتە گیانی پاکی دڵسۆزانی نیشتیمانەکەیان و خەباتگێرانی ڕێگەی ڕزگاری و دیموکراسی و موسڵمانان و کەسانی بێ تاوان، ئەو مەست و بێ هۆشانەی کە بە درۆ و دەلەسەی ناردنە بەهەشت گێژ و وێژ کراون بێ بەریش کراون لە هەموو جۆرە خووڕەوشتێکی مرۆڤانە لە هەموو جۆرە باک و پەرۆشی بۆ ژیان و ماڵ و گیانی موسڵمان و خەڵکی خەباتگێرخەباتگێڕ و ئازادیخوازان بە جۆرێک نە باکی دین و ئیسلامیەت و ئینسانیەت و ڕۆژ و موناسەباتەکانی پیرۆز و شوێن جیگای مزگەوت و مەرقەدیان هەیە و نە لە هیچ تاوان و بەدڕەوشتی و کاری نامەردانە و دوور لە هەموو خووڕەوشتێکی جوامێرانە دەسڵەمینەوە ئەوان وەکوو کەسانی ئالی هەڵدەسوڕێندرێن بە جۆرێک بوونەتە هەڕەشەیەک بە سەر ژیان و گوزەرانی ئەو گەلانەی گیرۆدەی داوێن دەبن.   
هەروەک شەلم کوێرم هیچ نابوێرم بەردراونەتە گیانی خەباتگێران، بێگومان ئەوانەش بە فیتی دیکتاتۆریەتی عێراقی پاشماوەی هەتیوەکانی سەدام تکریتی و بە پوول و پارەی لە عێراق دزراو، وا دڵڕەش کراون لە خەڵکی کوردستان نەک هەر سیاسەتی کەری دێزیان پێ جێبەجێ دەکەن، با خۆشیان تیا بچن - بە ئومێدی بەهەشت، کەچی دەچنە سەفەری دۆزەخ - و خەڵکیش بێ ژمار و بێ پژار و بێ جیاوازی و بێ لێککردنەوە بکەنە نیشانەی پەلامارەکەی خۆکوژی خۆیان، ئەوە بوو کە ئەو تیرۆریستە چەپەڵ و دەستڕەش و خوێنڕێژانە لە یەکی شوباتدا لە ڕۆژی پیرۆزی جەژنی قورباندا، ڕۆژی ئاشت بوونەوە و لێکتر بوردن و هاوبەشیی یەکتر کردن لە خۆشی جەژن و جەژنانەشدا، کوێر کوێرانە پۆلێک ڕۆڵە و جوامێر و خەباتگێڕی ی. ن.ک و پارتییان شەهید کرد، ڕاستە شەهیدانی ڕۆژی یەکەمی قوربان کەلێنی دیاریان لە ڕیزەکانی هەردوو حیزبە سەرەکییەکەی کوردستاندا بەجێهێشتووە، زیانی گەورە بەر کوردایەتی و کوردەواری و کەس و کار و هەڤاڵەکانیان کەوتووە، بەڵام لە هەمان کاتیشدا سەروەریی زۆریان بۆ خۆیان و کەس و کاریان دابین کردووە و سەربەرزیی و سەرفرازیش - یان بۆ حیزبەکانیان دەستەبەر کردووە و بەهەشتی نەمرشیان بۆ خۆیان مسۆگەر کردووە.
هەرلە کتێبەکەدا وتاری هەڤاڵ (کۆسرەت ڕەسوڵ عەلی) لێپرسراوی دەستەی کارگێڕی مەکتەبی سیاسی یەکێتیی نیشتمانیی کوردستان بە نوێنەرایەتی هەڤاڵ (مام جەلال) و مەکتەبی سیاسی لە مەراسیمی بە خاک سپاردن و پرسەی شەهید (شاخەوان عەباس) هاتووە:     
بە ناوی خوای گەورە و بەخشندە.      
مامی بەڕێزمان (مام عەباس)، خوشکی بەڕێزمان (ئاواز خان) هاوسەری (کاکە شاخەوان).    
هاوسەر و کەس و کار و هەڤاڵانی شەهیدی قاڕەمان و سەرکردە (کاکە شاخەوانی ماندوونەناس).       
هێزە سیاسییە تێکۆشەرەکان.        
جەماوەری دڵسۆز و ئازیزی شاری هەولێری خۆڕاگر.      
پێشمەرگە قاڕەمانەکان و ئامادەبووانی بە وەفا.        
ئەمڕۆ شەهیدێکی تری سەرکردەی یەکێتیی نیشتمانیی کوردستان و پێشمەرگەیەکی مەفرەزە سەرەتاییەکانی شۆڕشی نوێ و تێکۆشەرێکی کۆڵنەدەری کوردستان، دەسپێرینە خاکی پیرۆزی کوردستان و لەسەر وەسیەتی خۆی، لە تەنیشت هاوڕێ و هاوسەنگەری تەمەنی سیاسی و پێشمەرگایەتی، (شەهید ڕێباز) و (شەهید فاقە) دەینێژین، ئەم پێشمەرگە تێکۆشەر و سەرکردە خۆشەویستەمان.. (کاکە شاخەوان)، هەڤاڵ و هاوسەنگەر و برا و خۆشەویستی هەموومانە، کە بە درێژایی 16 ساڵ خەباتی پێشمەرگایەتی دژی داگیرکەران لە دەيان شەڕ و هێرشدا زەفەریان پێ نەبرد، کەچی لە تاوانێکی تیرۆریستاندا، (کاکە شاخەوان) لەگەڵ کاکە (خەسرەو شێرەی) ئەندامی سەرکردایەتی و پێشمەرگەی ئازا و تێکۆشەری خۆشەویستی کوردستان و (بەهرۆز قەشقە) قارەمانی خەباتی شار و شاخ و لێپرسراوی مەکتەبی مافی مرۆڤ و (دێدەوان) و (بەکر جۆڵا) و (ئاسۆ معلم) و (قادر قەرەچوغ) و (کاکە خەباتی مام شەریف) و (کاکە وریا) و (کاکە خەسرەو عوسمان)، (کاکە شێخە) و (کاکە حەسەن ئەحمەد پیرە) و دەيان هەڤاڵ و هاووڵاتی دڵسۆزی تردا گیانیان بەخشییە کورد و کوردستان و پاراستنی کاروانی دیموکراسی و ئازادی.        
نامادەبووانی سەربەرز و بەڕێز! 
لە کاتێکدا بە ناوی هەڤاڵی بەڕێز (مام جەلال) و مەکتەبی سیاسی یەکێتیی نیشتمانیی کوردستانەوە لە مەراسیمی ناشتنی (شاخەوان)ی سەرکردەدا، خەمخۆری خۆمان بۆ شەهیدانی مەڵبەندی سێ ی هەولێر، هەمان خەمیش بۆ شەهیدانی مەکتەبی سیاسی و سەرکردایەتی و هەڤاڵان و قوربانیانی لقی دووی پارتی دیموکراتی هاوپەیمان، ڕادەگەيەنين.
هەر لەناو کتێبەکەدا بەیاننامەی ئەنجومەنی حوکم هاتووە تێدا ئیدانەی تەقینەوەی شاری هەولێری کرد
ئەنجومەنی حوکم لە عێراق بە تووندی هەردوو هێرشە تیرۆریستییەکەی ڕۆژی 1/2/2004ی شاری هەولێری ئیدانە کرد، لە بەیانێکی ڕۆژنامەیی ئەنجومەنی حوکم دووپاتی کردۆتەوە کە ئەو هێرشانە گەلەکەمان زیاتر هان دەدات بۆ هەنگاونان بەرەو بنیاتنانەوەی عێراق لەسەر بنەمای دیموکراسی و ڕێزگرتنی مافەکانی مرۆڤ کە هەموو هاووڵاتیان بە مافەکانیان شاد بن، ئەمەش دەقی بەیاننامە ڕۆژنامەنووسییەکەی ئەنجومەنی حوکمە:        
 گەلی عێراق بە عەرەب و کورد و تورکمان و بە موسڵمان و مەسیحییەوە، ئەوان ئاشتیخوازن و تەبایی و ئارامیی و ئۆقرەییان گەرەکە، بەو هێرشە قێزەونە تیرۆریستییانە ڕاچڵەکین کە کرانە هەردوو بارەگای پ.د.ک و ی.ن.ک لە شاری هەولێر و لە ئەنجامدا پۆلێک ڕۆڵەی کوردی خۆشەویست شەهید بوون، لە چ کاتێکدا لەو کاتەی کە ئاهەنگی جەژنی قوربانیان دەگێڕا، ئەو هێرشە تیرۆریستییانە، ئەو پیاوکوژانە لێی بەرپرسیارن کە نامۆن بە عێراق و هیچ پەیوەندییەکیان نییە بە خاکی عێراقەوە و لە خراپە زیاتریان نییە بۆ گەلی عێراق و دەشیانەوێت کۆسپ بخەنە بەردەم کاروانی عێراقییەکان و سەربەخۆیی و پێکهێنانی حکومەت پەک بخەن، بەڵام لە شکست زیاتر هیچی تریان دەست ناکەوێت، ڕووداوەکەی هەولێر و پێشتریش لە نەجەف و بەغدا و کەربەلا و موسڵ، کار ناکاتە سەر گەلەکەمان، بەڵکو زیاتر سوور دەبێت لەسەر هەنگاونان بەرەو دیموکراسی و ڕێزگرتنی مافەکانی مرۆڤ و وەلانانی پەرتەوازەیی و ناکۆکی و بنیاتنانی عێراق کە تیایدا هەموو هاووڵاتیان بە تەواوی مافەکانیان شاد دەبن بێ جیاوازی دین و نەتەوە و مەزهەب و عەشیرەت.    
خوێنی ئەو قوربانییانە بە فیرۆ ناڕوات کە لە لێپرسراو هەولێری دێرین ڕژا، ئەو شارەی کە مێژوویەکی دوورو درێژ و پرشنگداری هەیە لە خەبات دژی دیکتاتۆریی و زۆرداری.    
ئەو شارەش کە بە بۆنەی ڕووخانی زۆرداری ئەنفال و کیمیابارانەوە ئاهەنگی گێڕا سەرلەنوێ ئاهەنگی سەقامگیریی و ئاسایش و ئاوەدانکردنەوە دەگێڕێت و بکوژە بەکرێگیراوە دووڕووەکانیش دەچنە زبڵدانی مێژووەوە.     
ئەنجومەنی حوکم  
١/٢/٢٠٠٤
هەرلەم کتێبەدا وێنەو بایۆگرافی شەهیدان وچەندین بەیاننامە بڵاوکراوەتەوە.
ئەم کتێبە بەشێوەی کاغەزی لە کتێبخانەی بۆردی هۆشیاری بەردەستە.