ئەمڕۆ(٤٥) ساڵ بەسەر شەهیدبوونى فەرماندەى لێهاتوو مستەفا سەعید زۆراب پێنجوێنی-دا، تێدەپەڕێ، شەهیدی جوانەمەرگ، لەساڵی(۱۹٥۷) لەگەڕەکی کانی حەیات، لەشارۆچکەی پێنجوێن چاوی بەدنیای پڕچەوساندنەوەی کورددا هەڵهێناوە، هەرکە هەستى بەچەوسانەوەى میللەتەکەى کردووە ئەوەى لەلا دروستبووە کە بەهەرقیمەتێک بێت دەبێ تێبکۆشێ و خەبات بکات بۆ نەهێشتنى ئەو تووندوتیژییەى بەرۆکى خەڵکە بەشمەینەتەکەى گرتووە.  
بەهەر هۆکارێک بووبێت نەیتوانیوە درێژە بەخوێندن بدات، شانى داوەتەبەر کرێکارى و لەبەهێزى جەستەیدا ئەرکى دوو کرێکارى بەڕێکردووەو رۆژانەى دوو کرێکاریشی پێدراوە!
کاتێکیش ئاشبەتاڵ بەجوڵانەوەى ئەیلوول دەکرێ لەساڵی(۱۹۷٥) هەروەکو باقى شوێنەکانى تر رژێمى بەعس کەوتە وێزەی گەنجانی پێنجوێن و سووکایەتیان پێدەکرا و رۆژانە ئیهانە دەکران، شەهید مستەفا سەر بۆ خیانەتکاران و جاسووسەکان شۆڕناکا و چەندینجار بەگژیاندا ئەچێتەوە، لەشەڕێکدا لەپیاوێکى رژێم دەدا و بریندارى دەکا و برایەکی شەهید مستەفا بەناوی حەمە ئەمین دوو دانى لەوشەرەدا دەشکێت. هەمیشە پیاوانى رژێم لێی ترساون و چاودێریان کردووە، ئەم و هاوڕێکانى سام و ترسى ئەو رژێمە دڕندەیەیان لەناو پێنجوێندا شکاند و چەندین گەنجى بەهەڵوێست و نیشتمانپەروەر چاویان لەمان کرد، چەندینجار لەگەڵ هاوڕێکانى دەستگیردەکراو دواى ئەوەى هیچیان لێیان دەستنەدەکەوت ئازاد دەکران.
ساڵی(۱۹۷٥) پەیوەندی دەکات بەڕێکخستنەوەو لەتەمێکردنى جاسووس و رەفیق حزبییەکان دەستى نەپاراستووەو تەمێکردنى رەفیق حیزبییەک کەزۆری بۆ کۆمەڵێک فەرمانبەر هێنابوو تابیان کات بە بەعسی، یەکێک لەچالاکییەکانى بووە. شەهید ساڵی(۱۹۷۷) زیندانی دەکرێت و پاش ئازادکردنی ئەبێتە پێشمەرگە، بەشداری کارەساتی هەکاری دەکات هەرلەوێ لەبەر وریایی و لێهاتوویی و ئازایەتی، شەهید عەلی عەسکەری ئەیکاتە فەرماندەی مەفرەزە.
پاش چەندین نەبەردی و شەڕی نابەرامبەر خۆی ئەگەیەنێتەوە چەمی شلێر، باوکی کڵاشینکۆفێکی بۆ ئەکڕێ و نایەڵێت کوڕە پێشمەرگەکەى بێ چەک ببێت. شەهید مستەفا فەرماندەیی چەندین داستان و نەبەردی کردووە، داستانی تۆڵەی شەهید دێوانە مەجید گەورەترین شاهیدی قارەمانێتین. بەشداری شەڕەکانی هاوکاری کوردەکان و حزبەکانى رۆژهەڵاتی کوردستانى کردووە.
بەداخەوە لەڕێکەوتی(۱۹/١٠/١٩٨٠) لەچیای مامەندە لەشەڕی پارێزگاری لەسەرکردایەتی یەکێتیی نیشتمانیی کوردستان لەگەڵ شەهیدان مامە رەشەی گەڵاڵی و عەبدوڵڵا شێنەیی و محەمەد خالید کۆیی چوونە کاروانی شەهیدان و نەیانهێشت پیلانی داگیرکردنی سەرکردایەتی سەرکەوێت.
هەزاران سڵاو لەگیانی پاکی شەهید مستەفاو شەهید حەسەنی برای و مامە رەشەی گەڵاڵی و عەبدوڵڵا شێنەیی و محەمەد خالید کۆیی و سەرجەم شەهیدانی کوردو کوردستان.