ئارام حسێن

لەدواى هەرەسى جووڵانەوەى ئەیلول کە ئاشبەتاڵ بەگەورەترین بزوتنەوەى چەکداریى لەمێژووى سیاسیماندا کرا، لەڕەوشێکى ئاوادا کە نائومێدیی و بەچۆکداهاتن ورەى تاک بەتاکى گەلەکەمانى تا ئاستى هەڵنەسانەوە برد(ی.ن.ک) بەسیاسەت و ستراتیژێک کە پشتبەستووبوو بەو گۆڕانکاریانەى لەڕۆژهەڵاتى ناوەڕاستدا دەگوزەرا دەستیدایە شۆڕشى نوێ.
دروستبوونى شانەکانى رێکخستن لەناو چینە جۆراوجۆرەکانى خەڵکدا ئەوپەڕى سەرکەوتن بوو کە توانرا لەماوەیەکى کەمدا بیروباوەڕى(ی.ن.ک) سەرتاسەرى کوردستان بگرێتەوە و دەستبکرێ بەچالاکى سیاسیی و پارتیزانى، لەبارودۆخێکى کۆمەڵایەتى و سیاسیی ئاوادا شەهیدان(ئارام و هیواو سەردار)و هاوڕێکانیان لەڕێکخراوى سلێمانی و لەشانەیەکدا دەستدەکەن بەجوڵانەوەى سیاسیى و پارتیزانى لەناوشارەکان بۆ پاڵپشتى هێزى پێشمەرگەى کوردستان.
لەو قۆناغەدا و لەدواى چەندین چالاکى سیاسیی و سەربازیى و لەناوبردنى فاشیستێکى گۆشکراو بەتەعریب و تووندووتیژیی بەعس، دواى ئەو چالاکیانە لەلایەن سیخوڕێکەوە ئاشکرادەبن و یەک یەک دەستگیردەکرێن.
لەدواى ئەشکەنجەیەکى زۆر و بەگیانى بەرزى رووبەڕووبوونەوە و پڕ لەبیروباوەڕى(کۆمەڵەى رەنجدەرانى کوردستان)ەوە هیچ شتێک لەسەر نهێنییەکانى شۆڕش و هاوڕێکانیان نادرکێنن، لەدواى(٢٨) رۆژ لەدەستگیرکردنیان، بەداخەوە بەهۆى ئەو بەڵگانەى دەست سیخوڕەکە کەوتبوو و دابوویە ئەمنى سلێمانى رۆژى(١٧/١٢/١٩٨٥) لەبەردەم بیناى ئامادەیی رۆشنبیردا و بە بەرچاوى زۆرێک لەفەرمانبەرانى فەرمانگەکانى سلێمانی و پارێزگار و بەڕێوەبەرى ئەمنى سلێمانییەوە گولەباران کران و گیانى پیرۆزیان بەکورد و کوردستان بەخشى.

ژیاننامەى هەرسێ شەهید
 
شەهید ئارام محەمەد کەریم
ئارام محەمەد کەریم ناسراو بەنەبەز لەساڵی(1960) لەشاری هەڵەبجە لەدایکبووە کوڕەزای ناتیقی شاعیرە. خوێندنی سەرەتایی لەقوتابخانەی نەورۆز و ناوەندی لەکانێسکانی کوڕان و ئامادەیی لەبەشی وێژەیی سلێمانی تەواوکردووە. ساڵی(1979) لەکۆلێژی یاسا لەبەغدا وەردەگیرێ کە یەکێکبوو لەئاواتەکانی خۆی، لەساڵی(1982) کۆلێژ تەواو دەکات. ساڵی(1976) پەیوەندی کردووە بەکۆمەڵەی رەنجدەرانی کوردستان-ەوەو ئەندامی چالاکی کۆمیتەی شار بووە.
لەچەندین چالاکی ناوشاردا بەشداریکردووە هەروەها نووسەرێکی زۆر بەتواناو پارێزەرێکی چالاک بووە. زۆربەی نووسینەکانی لەڕادیۆی دەنگی گەلی کوردستانی جاران بڵاودەکرایەوە، دوو کتێبى ئامادەبوون بۆ چاپ، یەکێکیانى بەناوى"کۆڵۆنیالیزمی عێراق لەکوردستانی باشوور" بەچاپ گەیەنرا، ئەوەى تریشیان بەناوی"مافی چارەی خۆنووسین" بەچاپ نەگەیەنرا.
رۆژی(١٩/١١/١٩٨٥) لەلایەن جەللادەکانى بەعسەوە دەستگیرکراو لەدواى ئازار و ئەشکەنجەیەکى زۆر پاڵەوانانە بەرگەى هەموو ئەو ئەشکەنجانەى گرت و هاوڕێیانى رێکخراوى سلێمانى پاراست. بەداخەوە رۆژی(17/12/1985) لەگەڵ هەردوو هاوڕێیدا شەهیدان(هیوا و سەردار) لەبەردەم ئامادەیی رۆشنبیر گولەبارانکران.

شەهید هیوا فایەق فارس
شەهید هیوا فایەق فارس لەساڵی(١٩٦٣) لەسلێمانی لەگەڕەکی دەرگەزێن لەبنەماڵەیەکی نیشتمانپەروەر لەدایکبووە. بەهۆی ئەوەی کە باوکی و دایکیشی خەریکی کوردایەتی و کاری رێکخستن بوون، ئەویش هەرزوو خولیای کوردایەتی بووە، ساڵی(١٩٨٢) پەیوەندی بەڕێکخستنەکانی(ی.ن.ک)ەوە کردووە و ئەندامێکی چالاک بووە. ساڵی(١٩٨٢) لە شەشی ئامادەیی سلێمانی دەبێ لەچالاکییەکدا دەستگیردەکرێ، هەرچەند بەرگریی دەکات و دان بەهیچ شتێکدا نانێت، بەڵام هەر حوکم دەدرێ و دەگوازرێتەوە بۆ زیندانی ئەبوغرێب.
ساڵی(١٩٨٤) بەگۆڕینەوە لەگەڵ فاشیستێکدا ئازاد دەبێت. ئەو ئەشکەنجە و حوکمەى درا بەسەریدا کاریگەرى لەسەرنابێ و لەجاران چالاکانەتر بەردەوام دەبێت لەکارى رێکخراوەیی و سەربازیدا و پاش چەند چالاکییەکی ناوشاری سلێمانی، بەهۆی خیانەتی هاوڕێیەکی خەت مائیلی خۆیانەوە لەگەڵ شەهید(ئارام و سەردار) دەستگیردەکرێن، هەرچەند بەرگریی دەکەن، بەڵام بەهۆی بوونی بەڵگەکانەوە رۆژی(١٧/١٢/١٩٨٥) لەبەردەم ئامادەیی رۆشنبیریى کوڕاندا گولەبارانکران و بەکاروانی شەهیدان گەیشتن.

شەهید سەردار عوسمان
شەهید سەردار لەبەهاری ساڵى(١٩٦٨) لەگەڕەکی دەرگەزێنی شاری سلێمانی لەخێزانێکی مام ناوەندا چاوەکانی هەڵهێناوە. ساڵى(١٩٨١) پەیوەندى بەڕێکخستنەکانەوە دەکا و وەکو کەسێکى چالاک لەڕێکخراوى سلێمانیدا کاردەکاو نازناوى سەلام وەردەگرێ. بەزیرەکی و بەپلەی زۆرباش هەموو قۆناغەکانی خوێندنی بڕیوە و گەیشتووەتە  قۆناغی شەشی زانستی، کاتێک لەئامادەکاریدا دەبێ بۆ گەیشتن بەکۆلێژی پزیشکی دەستگیردەکرێ.
کاتێک لەقەدەغەی هاتوچۆی ساڵى(١٩٨٥) رێبواری برای دەستگیردەکەن، قین و رقی سەردار زیاتر دەکات بۆ تۆڵەکردنەوە لەبەعسییەکان و دەستبەکاری عەسکەری دەکات تا ئەوکاتەی چالاکییەک لەبەردەم دواناوەندی رۆشنبیریی کوڕان لەگەڵ هاوڕێکانیدا(ئارام و هیوا) ئەنجامدەدەن و بەهۆى یەکێک لەسیخوڕەکانى رژێمى بەعسەوە ئاشکرا دەبن و هەریەکەیان بەجۆرێ دەستگیردەکرێن.
لە(١٩/١١/١٩٨٥) رژێمى بەعس هەڵدەکوتنەسەر ماڵى شەهید سەردار و لەناو جێگە دەریدەهێن، دواى ئەشکەنجەیەکى قورس و فشارێکى زۆر لەسەرى هەروەک خۆی پلانی بۆ دانابوو هیچ وشەیەك نە لەسەرخۆی و نە لەسەرکارەکانی و نە لەسەرهاوڕێیانى رێکخراو نادرکێنێت.
بەداخەوە لە(١٧/١٢/١٩٨٥)و لەبەردەم ئامادەیی رۆشنبیریی کوڕان و لەگەڵ(ئارام و هیوا)و بە بەرچاوی زۆرێک لەو خەڵکەى لە فەرمانگەکانەوە و بەزۆر راپێچکرابوون بۆ تەماشاکردن گولەبارانیان دەکەن. لەگەڵ ئەوەى زۆربەى ئەندامانى ئەم سێ خێزانە دەستگیرکران و دوورخرانەوە بۆ زیندانی(خناق)ی سەماوە ماڵەکانیشیان تاڵانکردن و بەشۆفڵ کەوتنە رووخاندنیان، تا ساڵی(١٩٨٨) لەغەریبایەتى و دوور لەنیشتمان ژیانیان گوزەراند و دواجار بەلێبوردنى گشتی ئازادبوون و گەڕانەوە بۆ شارەکەى خۆیان سلێمانى.