لەچوارچێوەی بەرنامەکانی بۆردی هۆشیاری- مەکتەبی راگەیاندن و هۆشیاری، بۆ تۆمارکردن و نووسینی مێژووی شۆڕشی نوێ و بەدۆکیۆمێنتکردنی، ئەمڕۆ شەممە(٢٣/٨/٢٠٢٥) کاتژمێر(١٠:٣٠)ى پێشنیوەڕۆ بەئامادەبوونى ژمارەیەکى زۆر لەمامۆستایانى زانکۆ و نووسەر و رۆژنامەنووسان و بەرپرسانی حزبی و حکومی، لەکافتریاى مۆزەخانەى نیشتمانى ئەمنە سوورەکە رێوڕەسمى ناساندن و دابەشکردنى کتێبى(راگەیاندن و هونەر لەشۆڕشى نوێدا) لەنووسینى هونەرمەندو راگەیاندنکار و نووسەر عەباس عەبدولڕەزاق سازکرد..
سەرەتای مەراسیمەکە بەکردنەوەى پێشانگایەکى فۆتۆگرافەرى لەلایەن سیاسەتمەدار و نووسەر"فەرید ئەسەسسەرد" کرایەوە لەسەر راگەیاندن و هونەر لە شاخ بەهەموو بەشە جیاوازەکانییەوە، بەساتێک وەستان بۆ گیانی پاکی شەهیدان رێوڕەسمەکە دەستیپێکرد و ڤیدیۆ گرافیکێک لەسەر گرنگى راگەیاندن و هونەر لەشۆڕشى نوێدا  نمایشکرا و دواتر نووسەرى کتێبەکە عەباس عەبدولڕەزاق ناسراو بەعەباسى ڤیدیۆ، لەوتەیەکدا باسی لەگرنگی کتێبەکە کرد: لەگەڵ دروستبوونى شۆڕشى نوێ بەڕابەرایەتى یەکێتیى نیشتمانیی کوردستان هەرلەسەرەتاوە نەخشەى ئەوە داڕێژرا کە شۆڕشەکە هاوتەریب لەگەڵ بزوتنەوەى چەکداریدا بۆ بەرگریى لەخەڵک و وڵاتەکەى ناوەندى راگەیاندن و هونەر و توێژینەوەى زانستى داڕێژێ و لەڕاستیشدا هەر وایکردو لەهەموو ئەو بوارانەدا گەشەکردنێکى زۆرى بەخۆوەبینى و سەربارى ئەو ژیانە سەختەى کادیرانى تیابوو نەبوونى پێداویستییەکانیش کۆسپێکى ترى بەردەم ئەو وەرچەرخانە بابەتییە بوو کە(ی.ن.ک) دەستیدابوویە، بەڵام بەباوەڕبەخۆبوون و وەستانەوە لەبەردەم هەموو ئەو بەربەستانەدا توانى مێژوویەکى لێوانلێو لەچالاکى هونەریی و کتێب و نامیلکە و رۆژنامە و گۆڤار چاپ و بڵاوبکاتەوە.
لەکۆتایی رێوڕەسمەکەدا کتێبەکە بەسەر بەئامادەبواندا بەخشرا و سوپاس و پێزانینێکى زۆر ئاراستەى نووسەرى کتێبەکە و لێپرسراو کارمەندان و نووسەر و رۆژنامەنووسانى بۆرد کرا.