بافڵ جەلال تاڵەبانی سەرۆكی یەكێتیی نیشتمانیی كوردستان، لە كەرنەڤاڵێكی گەورە و فراواندا بۆ ناساندنی كاندیدانی لیستی 222ی یەكێتی لە هەولێر، كە دەیان هەزار كادر و لایەنگر و جەماوەری یەكێتی ئامادەبوون، پەیامێكی پڕ لە جۆش و خرۆشی پێشكەشكرد و داوای لە خەڵكی هەولێری خۆشەویست كرد بچن سندوقەكان سەوز بكەن و دەنگ بە لیستی 222 بدەن.
سەرۆك بافڵ، سەرەتای پەیامەكەی بە ئاڕاستەكردنی سڵاو لە هاووڵاتیانی سنوورەكانی شاری هەولێر و ئیدارەی سەربەخۆی سۆران و پێكهاتە نەتەوەیی و ئایینییە جیاوازەكانی سنوورەكە دەستپێكرد و وتی: هەولێریانی ئازیز، خوشك و برایانی كرستیان و توركمان، كاسبكاران، جووتیاران، كارمەندان و مامۆستایان و خوێندكاران، گەنجان، كەسوكاری شەهیدان، تێكۆشەران، ژنان، پێشمەرگە ئازاكان، كەمئەندامانی سەنگەر، زیندانییە سیاسییەكان، بەدڵ و بەگیان سڵاو لە هەر هەمووتان و «ئێمە دەنگی تۆین لە بەغداد»، دەنگ و سەنگ و هێزی تۆین لە بەغداد.

پاشان وتی: پێش ئەوەی دەستپێبكەم، پێویستە هەڵەیەك راست بكەمەوە، قەڵای هەولێر سەوزە، سوور نییە و هەرگیز سوور نابێت. جەختیشیكردەوە ئەوە یەكێتیی نیشتمانیی كوردستانە كە دەچێت بۆ بەغداد، رێككەوتنێكی هەمیشەیی دەكات لەگەڵ حكومەتی بەغداد، تا ئەم نیگەرانی و ئازارەی لەناو دڵتاندا هەیە نەمێنێت، ئێمە بودجەی كوردستان وەكو ساڵانی 2004تا2013 لێدەكەینەوە، كە ئەوكات چۆن بوو، دەبێت ئەمڕۆش وابێت و باشتربێت، ئێمە كە دەچین بۆ بەغداد، پڕۆژەی گەورە دەهێنین بۆ كوردستان، بەڵام بە رێبازی یەكێتییانە، لەزاخۆوە تا هەڵەبجە، ئێمە هەموو كوردستان بە یەك چاو سەیردەكەین، دەبێت نەوت و گاز و دیزڵ بە نرخێكی گونجاو بێت بۆ كوردستان، تا هەواكەی ئێوە پاك ببێتەوە، تا ئێوە بتوانن هەناسە هەڵبكێشن، ئەو هەموو پاڵاوگە نایاسایی و علوجانە، كە خۆتان دەزانن خاوەنەكانیان كێن، دەبێت لەو دووكەڵە بۆگەنە رزگارتان بكەین.

بەشێكی دیكەی پەیامەكەی ئاڕاستەی بازرگان و كاسبكارانی هەولێر كرد و رایگەیاند: ئێوە خوێنی ناو دەماری ئابووریی كوردستان و هەولێرن، ئەو ژن و پیاوانەی بەیانیان دوكانەكانیان دەكەنەوە، ئەوانن زۆرترین ئازاریان بینیوە لەبەر ئەم دۆخە ناتەندروستەی نێوان حكومەتەكانی هەولێر و بەغداد، ئابووریی كوردستان ئەزیەت دراوە، گیرفانی ئێوە ئەزیەت دراوە، دڵی ئێوە و بزنسەكەی ئێوە ئەزیەت دراوە، بەڵام خەڵكی دیكە هەیە لە هەمان ئەم شارە دەژی، نەك وەكو پادشا، بەڵكو وەكو فیرعەون دەژی، دەپرسم بەس نییە ئەوە؟، وتیشی: دەزانم ئێوە دەنگ بە ئێمە دەدەن، چونكە دەزانن ئێمە بەهێزین لە بەغداد، ئێمە كوردستان جوان دەكەینەوە، ئەوە ئێمەین بەرگریی لە هەرێم دەكەین، ئەو پردی پەیوەندییانەی كە سووتاندوویانە لەنێوان ئێرە و عیراقدا، ئێمە زیندووی دەكەینەوە و چاكیدەكەینەوە، ئێمە سەقامگیریی دەگێڕینەوە بۆ كوردستان، تا دوكان و كەسابەتتان گەشەبكەن و بازاڕەكانتان گەورە ببن، ژیانتان باش بێت.
لە بەشێكی دیكەی پەیامەكەیدا، سەرۆك بافڵ، باسی لەوەكرد كاتێك پەیوەندیی هەرێم و بەغداد باش بوو، ژیان چەند خۆشتر بوو، ئەو ساڵە زێڕینانەی سەرۆك مام جەلالتان لەبیرە، كە ئێوە چۆن دەژیان؟، بەڵام ئێستا تەماشای هەولێر بكەن ئایا وەكو پێویستە؟ بێگومان نەخێر، بۆیە ئێمە كەرتی بازرگانی زیندوودەكەینەوە لەنێوان هەولێر و هەموو عیراقدا، ئەو هەموو پارەیە هەیە، با بێن لێرە سەرفی بكەن، هەلی كار دروستدەكەین، بەرگریی لە جووتیارەكانمان دەكەین، گەرەنتی ئەوەیان دەدەینێ كە دەبێت ئەوەی هەیانە لەكاتی خۆیدا بفرۆشرێت بە نرخێكی گونجاو. ئەو پەیوەندییانە دەبووژێنینەوە وەك ئەو ساڵانەی كە كوردستان گەشەی كرد، ئەو پەیوەندییەی مام جەلال و كاك كۆسرەت و تێكۆشەرەكانی دیكەی یەكێتی دروستیان كرد، وتیشی: لە 2014وە دامەزراندن بۆ خەڵكی هەولێر نییە، بەڵام بۆ ئەوانەی نزیكی فیرعەونەكانن دامەزراندن هەرگیز نەوەستاوە.

سەرۆك بافڵ، لە پەیامەكەیدا، بە خوشك و برایانی كرستیانی وت: «ئێوە بەشێكی سەرەكین لە رۆح و دڵی كوردستان، ئێمە پارێزەری ئێوە دەبین و بەرگرییتان لێدەكەین، هاوپەیمانی ئێوە دەبین، شانبەشانتان دەوەستین، بەرگریی لە خۆتان و ئایینتان، لە كەلتور و زمانتان و لە زەویتان دەكەین، ئەو زەوییە پیرۆزانەی كە لێتان دزراوە، خۆشتان باش دەزانن كێ دزیویەتی و خۆی پێ دەوڵەمەند كردووە. تا مافەكانی خۆتان وەربگرنەوە، ئێمە شانبەشانی ئێوە شەڕ دەكەین، بەڵێن بێت بۆ هەر سانتیمەترێك زەوی كە لەئێوە دزراوە، نەك هەر لە بە‌غداد، بەڵكو دەیكەینە كێشەیەكی نێودەوڵەتی و لە ئەمریكاوە دەستپێدەكەین». پاشان رووی پەیامەكەی كردە خوشك و برایانی توركمان و پێیوتن: توركمانە ئازیزەكان، ئێوە رەسەنن، ئێوە خەڵكی هەولێرن، خەڵكی كوردستانن، سەدان ساڵە ئێوە لێرە دەژین، رۆحمان وەكو یەكە، دەپرسم كوا مافەكانتان، كوا مافەكانتان لە سیاسەتدا، لە كەلتوردا، لە زماندا، كوان نوێنەرە راستەقینەكانتان؟ بۆچی نابێت توركمان نوێنەرایەتیی خۆی بكات؟ بۆ نابێت؟!، من لێرەوە بەڵێنتان پێدەدەم ئەوە دەبێت. ئێمە بەرگریی دەكەین لە سیاسەتتان، لە كەلتورتان، لە زمانتان، چۆن بەرگریی لە كورد و مافەكانی دەكەین، بەرگریی لە ئێوە و مافەكانی ئێوەش دەكەین، بەرگرییەكی راستەقینە، جا ئیتر بە سیاسەت یان بە قسە و ئەگەر پێویست بكات بە هێز، ئەوە ئێمەین بەرگریی لە خەڵك و خاكی كوردستان دەكەین. ئێمەین بەرگریی دەكەین لە شارەكان، با ئێمە بەرگریی لە هەولێر بكەین، بزانن ئاخۆ كەس دەوێرێت هەموو هەفتەیەك درۆنێك لە سلێمانی بدات؟، كەچی قسە زلەكان دەڵێن ئێمە وا و وا دەكەین. پێیان دەڵێم خۆتان خۆتان بپارێزن هەفتەی درۆنێك دەدەن بە تەپڵی سەرتاندا، ئەوكاتە وەرە فشە بۆ من بكە، ئێمە بەرگریی لە هەولێر دەكەین، چونكە هەولێر سەوزە و هەر سەوز دەبێت، ئێرە پایتەختی كوردستانە، سوێند بە گۆڕی شەهید ئاكام و هەموو شەهیدانی یەكێتی و هەموو كوردستان، بە لا الە الا الله هەرگیز هەولێر بەجێناهێڵین، ئەوە دوو هەڵبژاردنە نزیكترین كەسی خۆم دەنێرم بۆ لای ئێوە، كاك دەرباز و كاك قوباد و هەروا دەبێت، بەڵام هەواڵێكی دیكەم هەیە بۆتان، من بەنیازم بەلای كەمەوە هەفتەی جارێك خۆم لە هەولێر بم.

لە درێژەی پەیامەكەیدا روو لە خەڵكی سۆران، وتی: سەربەرز و بەڕێزەكانی سۆران، ئازاری ئێوە دەزانم، دەزانم چ قورساییەك لەسەر شانی ئێوەیە، چ گوشار و ستەمێكتان لێدەكرێت، بەڵام ئێمە ئەمڕۆ زۆر كێشەی گەورەتر چارەسەر دەكەین، كاك قوباد بۆی باسكردووم كە گرفتەكانتان چییە، بەڵام باڵانسەكە رێكدەخەینەوە، هەموومان باش دەزانین چۆن و چەند ساڵە بەرگرییتان لە یەكێتی كردووە و لەگەڵیدا ماونەتەوە، بۆیە لەبەر ئەو وەفادارییەتان و كەلتوری یەكێتیی نیشتمانیی كوردستان، بەڵێن بێت تا رۆژی قیامەت لەگەڵتان دەوەستین، ئەوەی پێمان دەكرێت بۆ ناوچەكەتان بۆتان دەكەین، هەوڵدەدەین بە دابینكردنی هەلی كار بۆ دڵسۆزەكانمان و تێكۆشەرەكانمان، دەیانخەینەسەر سەرمان و سەر چاومان و لەوەش گرنگتر، ئیتر غەدر لەكەس قبووڵ ناكەین، ئێمە هەموو كەسێكی ئەو ناوچەیە بە یەك چاو سەیر دەكەین، وەكو حزبی دیكە نین، ئێمە كە شەڕ دەكەین، شەڕ بۆ هەموو كورد دەكەین، شەڕ دەكەین بۆ هەموو هاووڵاتییەك، شەڕ بۆ گیرفانەكانی خۆمان ناكەین.

لە ئاماژەكردنیش بە هۆكاری پێكنەهێنانی كابینەی نوێی حكومەتی هەرێم، سەرۆكی یەكێتی رایگەیاند: دەزانم دەپرسن بۆچی كابینەی حكومەتمان نییە، لەوەڵامدا دەڵێم لەبەر ئێوە، چونكە هەرگیز ناچینە ناو سیستمێك كە جیاوازیی لەنێوان هاووڵاتییەكانماندا بكات، حكومەتی هاووڵاتی نەبێت و وەك پێویست خزمەتتان نەكات، شكۆتان نەپارێزێت، بۆچی ئێمە بەشداربین لە حكومەتێكی لەو جۆرەدا؟ لێرە لە پایتەختی كوردستان پرسیارێك دەكەم و بەڵێن بێت بە قسەی ئێوە دەكەم، بچینە ناو حكومەتێكی لەو جۆرە، یان بچینە ناو حكومەتێكی دیكە كە خزمەتتان بكات و ئاسایش و شكۆتان بپارێزێت؟ ئەوا لێرە ریفراندۆمێكمان كرد هەمووتان دەڵێن نەخێر.

سەرۆك بافڵ، لەبارەی ئازادییەكانیشەوە، وتی: كاتێك بیانییەكان دێنە ئێرە بەتایبەتی ئەوانەی لێرە ناژین و لێرە دەوام ناكەن، زۆر دڵیان بە هەولێر خۆشە، ئەو بینا بەرزانە دەبینن، دەڵێن هەولێر زۆر پێشكەوتووە، بەڵێ وایە بیناكانمان بەرزە، جادەكانمان پانە، بەڵام هیچ مانای نییە و بەهای نییە، ئەگەر خەڵكی هەولێر ئازاد نەبن، جادەی پانتان بۆ چییە ئەگەر هەموو رۆژێك بخنكێنرێن؟ كۆشكێكتان بۆ چییە، ئەگەر كەس نەتوانێت قسەبكات لەترسی ئەوەی زمانی دەبڕدرێت؟ هۆڵێكی گەورەمان بۆ چییە ئەگەر چالاكوانێكی ئاسایی نەتوانێت بە دزێك بڵێت دز؟ بەكزی و بێدەنگی قسەمەكەن، هاواربكەن و پشتتان رێك و سەرتان بەرزبێت، داوای ماف و شایستەیی خۆتان بكەن، چونكە ئێوە یەكێتین و كوردن، ئێوە لەكەس ناترسن، بەڵكو خەڵك لە ئێوە دەترسێت. ئێمەی یەكێتی لەپشتتان دەوەستین وەكو سەفین، دەیانەوێت بتانترسێنن، گوشارتان بخەنەسەر، هەڕەشەتان لێبكەن و خیانەتتان لێبكەن، بەڵام پێیان ناكرێت، هەرگیز ناتوانن رۆح و دڵتان كۆنترۆڵ بكەن، رۆژێك دادێت ئەو ئاگرە سەوزەی لەناو دڵتاندا دەسووتێت، هەموو غەدرەكانیان و قەسرەكانیان دەسووتێنێت، ئەو رۆژەش هاتووە 11ی 11یە، دەزانم خەڵكی هەولێر لە رۆژی دەنگداندا وەكو تۆفانێكی سەوز هەموو سندوقەكان سەوز دەكەن، بەخوای گەورە بەڵێنتان دەدەینێ لەگەڵتان دەوەستین، شەڕ دەكەین بۆ خەڵكی هەموو كوردستان، شەڕ دەكەین بۆ رێككەوتنێكی هەمیشەیی و واقیعی لەگەڵ بەغداد، شەڕ دەكەین بۆ مووچەكانتان، بۆ شكۆ و كەرامەتتان.
تەوەرێكی دیكەی پەیامەكەی سەرۆك بافڵ، قسەكردن بوو لەسەر نرخی كارەبا و بەنزین و ئەوەی خستەڕوو كە خاوەنی پاڵاوگە علوجەكان حەزدەكەن وابێت، چونكە بەوە گیرفانیان پڕ دەبێت، ورگیان زلتر دەبێت و غەبغەبەیان لە شەشەوە دەبێتە هەشت، سەیرەكەش لەوەدایە كە كەسێك نییە لە كوردستان بە بیانییەكان و كونسوڵەكانیشەوە كە نەزانن وایە، بۆیە دەنگ و هێز بدەن بە ئێمە، دزییەكە رادەگرین، با لەوەوە دەستپێبكەین و دەڵێین بەسە. ئێمە بووین توانیمان بەرگریی لە كوردستان بكەین لە بەغدادەوە، ئێمە بووین قانوونی هەڵبژاردنمان گۆڕی كە ئێستا هەڵبژاردنەكانمان كەمێك لە هەڵبژاردن دەچن، یەكێتی بوو وایكرد نەهێڵێت خوێن بڕژێنرێت لە بەغداد، یەكێتی بوو دوای ئەو هەموو ساڵە هەڵەبجەی كرد بە پارێزگا، یەكێتی بوو كەركوكی رزگاركردەوە بەبێ ئەوەی بهێڵێت یەك دڵۆپ خوێن بڕژێت و پارێزگارێكی كوردی دانایەوە لە كەركوك، یەكێتی بوو لەگەڵ سەرۆك وەزیرانی عیراق و تیمەكەی رێككەوت و مووچە هات بۆ كوردستان، بۆیە بەقسەمان بكەن بماننێرن بۆ بەغداد، با شەڕتان بۆ بكەین، ئێمە سەربازی تۆین، بەرگریی لە ماف و شكۆتان دەكەین، باری ئابووریتان چاك دەكەینەوە، هەر بە ئێمە دەكرێت، هەر ی.ن.ك-ە كە هێزی كاك كۆسرەت، سیاسەت و دیپلۆماسیی مام جەلالی هەیە و هێزی تۆیە لە بەغداد.

لە كۆتاییشدا، وتی: دەزانم دڵتان خۆشە و خوێنتان سەوزە، بەڵام ئەوە بەس نییە، ئەوەی دەیناسن، كورد بێت، توركمان بێت، عەرەب بێت، كرستیان بێت، كێی تر بۆی هەیە دەنگ بدات، قسەی لەگەڵ بكەن و جیاوازیی یەكێتی و حزبەكانی دیكەی پیشان بدەن، بیریان بهێننەوە هەر یەكێتییەكەی مام جەلال و كاك كۆسرەت و تێكۆشەرانە كە ئەم وڵاتەیان رزگاركرد لەو دیكتاتۆرە بۆگەنە، هەر ئێمەشین كە دەتوانین كوردستان چاكبكەینەوە و بۆ پێشەوەی ببەین و دەتوانین دەستی دزەكان ببڕین، هەروەها بە هێز و بە دیپلۆماسی، بەرگریی لە خەڵكی كوردستان بكەین. بڕۆن سندوقەكان سەوز بكەن، ئێوە سندوقەكان سەوز بكەن، ئەوەی تر لۆ منی لێگەڕێن، ئەمن دەزانم كو چاكی دەكەمەوە.