بافڵ جەلال تاڵەبانی سەرۆكی یەكێتیی نیشتمانیی كوردستان، دوێنێ لە پانێڵێكدا كە بەناونیشانی (خواست و ئاڵۆزییەكان: هەرێمی كوردستان لە دیمەنێكی عیراقی گۆڕاودا)، لە دیداری مێری پێشكەشیكرد، قسەی لەسەر چەندین پرسی گرنگ و دوایین پێشهات و گۆڕانكارییەكان كرد و لەبارەی پرسی هەڵبژاردنیشەوە، وتی: یەكێتیی نیشتمانیی كوردستان، هەڵبژاردن لەدوای هەڵبژاردن سەركەوتنی گەورەتر بەدەستدەهێنێت.
* کە پێکەوە کارمان کردووە، بە بەردەوامیی هەوڵی ئەوەمان داوە بتوانین سوودمان هەبێت بۆ خەڵک، پێکەوە رووبەڕووی داعش و قاعیدە بووینەتەوە، هەموومان پێکەوە عیراقمان ئازادکردووە و پێکەوە دەستووری عیراقمان نووسییەوە

* بە شانازییەوە دەتوانم ئەوە بڵێم یەکێتیی نیشتمانیی کوردستان یەک دۆلاری لە هیچ وڵاتێک وەرنەگرتووە و وەریشی ناگرین، دەبێت واشبێت

* دەبێت بڕیاری سیاسی لە عیراقدا سەربەخۆ بێت، دەشبێت بڕیارەکانی بۆ خەڵکی عیراق بێت و لەلایەن عیراقییەکانەوە بڕیارەکە بدرێت، هەرکاتێکیش ئەوە روویدا، هەموو شتێک لە عیراق بەرەوپێشەوە دەچێت

* بوونە سەرکردەیەکی سیاسی، نابێت بتخاتە سەرووی یاساوە، نابێت بتخاتە پێگەیەکەوە کە پارتەکانی تر لەناوبەریت، نابێت دزی لە بازرگانان بکەیت، نابێت سەلامەتی نەهێڵیت
سەرەتا سەرۆك بافڵ لە پانێڵەكەیدا باسی لەوەكرد لە رابردوودا سەرکردایەتی رووبەڕووی کۆمەڵێک کێشە بووەتەوە لە پاراستنی یەکێتی و یەکگرتوویی و دۆزینەوەی ستراتیژێک بۆئەوەی یەکێتی پارێزگاریی لە پێگەکەی خۆی بکات لە هاوبەشیکردنیدا لەگەڵ لایەنە سیاسییەکانی دیکەی عیراق.
هەروەها وتیشی: ئێستا دابەشبوون لەنێو یەکێتیی نیشتمانیی کوردستاندا نییە، ئێستا یەکێتی زیاتر یەکگرتووترە لەچاو جاراندا، بەڵگەشمان بۆئەوە دواهەمین هەڵبژاردنە، لە هەموو هەڵبژاردنێک کە ئەنجاممان داوە و ئەو سەرکردایەتییە نوێیەی کە هەڵمانبژاردووە، ئەو دۆخەش کە تێمانپەڕاندووە، تاقیکردنەوەیە بۆ حزبە سیاسییەکانی تر کە پێیدا تێدەپەڕن، بۆیە یەکێتیی نیشتمانیی کوردستان-یش ئێستا لە پێگەیەکی بەهێزتردایە، لەچاو جاراندا کە ئێمە کێشەی زۆرمان هەبووە، لەڕووی مێژووییەوە کێشەمان هەبووە، کاتێک کە مام جەلال نەخۆش کەوت، پاشان جێگرەکەی کاک کۆسرەت و پاشان هێرۆ خان، یەک لەدوای یەک. چەندین پارتی سیاسی لە مێژووی خەبات و کارکردنی خۆیاندا رووبەڕووی کێشە بوونەتەوە، بۆیە یەکێتی بەهۆی ئەو پشتگیرییەی کە هەیەتی توانیویەتی بەسەر کۆسپ و تەگەرەکاندا سەربکەوێت. لەماوەی 25 ساڵدا و چەند مانگ پێش ئێستا سەرکەوتنی بەدەستهێنا لە هەڵبژاردنەکاندا و بەتایبەتی لە هەڵبژاردنی ئەنجومەنی پارێزگاکاندا پلەی یەکەمی بەدەستهێنا و دەنگمان زیادیکرد، هەرچەندە زۆر پێی دڵخۆش نەبووم، چونکە تواناکانی یەکێتی لەو دەنگانەی بەدەستیهێنا زیاترە.
لەبارەی ئەوەی کە ئایا یەکێتی چۆن یارمەتیدەر دەبێت لە وەبەرهێنانی ئیقلیمیدا، سەرۆک بافڵ رایگەیاند: لەم کەشەدا کە پێیدا تێدەپەڕین، ئەگەر بێتو تەماشای سلێمانی بکەین، لە سێ ساڵی رابردوودا، لەناوجەرگەی قەیرانی داراییدا بەو وەبەرهێنانە بیانییە کەمەی کە هەیە، بەڵام براکەی من و تیمەکەیان توانیان پرۆژەی زیاتر لەو ماوەیەدا ئەنجام بدەن، تەنانەت لەو ماوەیەش زیاتر کە هەرێمی کوردستان لە گەشەسەندنێکی بەردەوامدا بوو، بودجەیەکی زۆرمان پێدەگەیشت. ئەوەش بیرۆکەیەکی زۆر سەرنجڕاکێشە بۆ چۆنێتی وەبەرهێنان کردن، بەڵام ئەگەر بمەوێت باس لە بارودۆخی سیاسی نەکەم و باس لە وەبەرهێنان و ئابووری و بزنس بکەم، ئەوا پارێزگای سلێمانی یەکەمە، هیچ کەسێک خۆشحاڵ نابێت ئەگەر بێتو پێی بڵێیت 50 ٪ی قازانجم بدەرێ. ئەو شتانە نییە، خەڵک لە باشوورەوە دێن، لێرە لە هەولێر و لە دهۆکەوە هاتوونەتە سلێمانی، بۆیە ئێمە لە دۆخێکی گەشەسەندووداین، بیهێنە پێش چاوت کە چۆن هەرێمەکە دەتوانێت گەشە بکات. ئەمەش بەس نییە، بەڵکو پێویستە لەسەر ئاستی ئیقلیمی هەموو ئەم گەشەکردنانە بڵاوبکرێنەوە، بەتایبەتی لەبەغداد کە توانایەکی زۆرباشی هەیە.
لەبارەی مامەڵەی یەکێتی لەگەڵ پارتەکانی دیکەی هەرێمی کوردستان، تەنها ئەوەندەی وت: ئەگەر راشکاوبم تێدەگەم لەوەی سێ سەرکردەی ئۆپۆزسیۆن هەن لە سلێمانیدا.
وتیشی: راستکردنەوە نییە، بەڵکو دەمەوێت زانیاریی زیاترت پێبدەم، هەموو پارتێک سیاسی نییە، ئەمە چاوەڕوانکراوە کە لە سلێمانیدا رووبدات، هەموو چالاکوانێکی سیاسی لە کوردستاندا هەیە و زۆرینەی چالاکوانە عیراقییەکانیش هەست بە سەلامەتی دەکەن لەناو سلێمانیدا، ئەمە زۆر جیاوازە لەوەی کەسێک لە گەندەڵی تێوەگلاوە، یان یەکێکی تر لەسەر کەیسێکی دیکە دەستگیر کراوە، ئەگەر بەشێوەیەکی روونتر قسە بکەین، «ئامۆزاکانی» ئێمە پارتێکی سیاسییان هەبووە، ئەمە ئەوە ناگەیەنێت کە بیبەستینەوە بە شتی ترەوە، ئێمە هەر باسی بەڵگە و دانپێدانان ناکەین، باسی تەلەفۆن و هاند درایڤەکان و کۆمپیوتەر و چەک و ناسنامە و بەڵگەکانی تر ناکەین، هەر وشەکانی لاهور کە لەتەلەفزیۆندا باسی کردووە بەڵگەن، ئەو وتی: من میلیشیام هەیە و بەکاریاندەهێنم هەتاکو مردنم. بۆیە بوونە سەرکردەیەکی سیاسی، نابێت تۆ بخاتە سەرووی یاساوە، نابێت بتخاتە پێگەیەکەوە کە پارتەکانی تر لەناوبەریت، نابێت دزی لە بازرگانان بکەیت، نابێت سەلامەتی نەهێڵیت.
سەبارەت بەو پێوانانەی کە دەبنە مایەی قەناعەت و خۆشگوزەرانیی خەڵک لە پێکهێنانی حکومەتی نوێدا، سەرۆک بافڵ وتی: هەموو ئەمانە پەیوەندییان بە سیستمێکەوە هەیە وەک لە پێگە و پۆستێک، پێگەیەک زۆر گرنگە بۆ جێبەجێکردنی پلانەکان، بەڵام هەمووی پەیوەندیی بە سیستمێکەوە هەیە. پرسیارەکە ئەوەیە ئایا هیچ کەس و لایەنێک لە هەڵبژاردنەکاندا سەرکەوتووبوون؟ بێگومان نەخێر، ئەگەر وانەبێت ئێمە ئەم وتووێژانەمان نابێت و پارتی براوە دەتوانێت حکومەت پێکبهێنێت، بەڵام لەدوای ئەو هەموو بەخشندەییەوە ئێمە هاوکاریی پۆستەکانی دیکەمان کردووە کە دەبێت رۆڵی خۆیان هەبێت، ئەوە پەیوەندیی بەوەوە هەیە ئێمە چۆن لەگەڵ پێشووتردا چی بکەین و چی نەکەین، ئەوەی زۆر گرنگە ئەوەیە کە حکومەتێکی هاوپەیمانی هەبێت، واتە هاوبەشیی هەبێت، دوو پارتی هاوبەشی سەرەکی هەیە ئێستا. پێکهێنانی کابینەی داهاتوو دەبێت زۆر دادپەروەرانە بێت، زۆر شەفاف بێت، بشتوانێت چارەسەری راستەقینەی گرفتەکانی هەرێمی کوردستان بکات، ئەگەر بەو شێوەیە پێکبهێنرێت، قسەکەم بۆ برادەرانی پارتی دیموکراتی کوردستانە ئەگەر تۆ هاوبەشت دەوێت، ئێمە هاوبەشت دەبین، هەر لە رابردووەوە کە پێکەوە کارمان کردووە، بە بەردەوامیی هەوڵی ئەوەمان داوە بتوانین سوودمان هەبێت بۆ خەڵک، پێکەوە رووبەڕووی داعش و قاعیدە بووینەتەوە، هەموومان پێکەوە عیراقمان ئازادکردووە و پێکەوە دەستووری عیراقمان نووسییەوە، ئەوە ئەو واقیعەیە کە ئێمە و هەمووان دەمانەوێت. لە روویەکی دیکەوە ئێمە ئۆپۆزسیۆنی یەکتری نین، ئەگەر بتەوێت یەکێتی نەهێڵیت لە سلێمانی، هەمان شت لە دهۆک و لە شوێنی تر روودەدات، بۆیە هەموو ئەمانە دەمانبەنەوە بۆئەوەی کە پێویستمان بە هاوبەشیی هەیە، تۆ شتی خۆت دەکەیت و من شتی خۆم دەکەم، نەخێر کەس ئەوەی ناوێت، ئێمە هاوبەشیمان دەوێت. دەمانەوێت پێکەوە کار بکەین، کە وامان کرد، لەدوای ئەوەوە دەتوانین هەموو شتەکان بخەینەوە سەر رێچکەی خۆی. تۆ وا بیر دەکەیتەوە هەموو ئەمانە پەیوەندییان بە زانیاریی گشتییەوە هەبێت. سەرۆک وەزیران، سەرۆک وەزیرانە، وەزیرێک پێویستە دەسەڵاتی خۆی هەبێت و بەشێوەیەکی روون جیابکرێتەوە، هەموو ئەمانەش دەبن بە دەستپێکێکی باش.
سەبارەت بە کارکردن بۆ هاوئاهەنگی و هاوکاری لەگەڵ پارتی، سەرۆکی یەکێتیی نیشتمانیی کوردستان، روونیکردەوە: نەک تەنها ئاسایش و ئارامی، نەبوونی دامەزراوە لە هەرێمی کوردستان نیشانەی لاوازییە، هەندێکجار دامەزراوەمان نییە، ئەمەش شێوازێکی گونجاو نییە بۆ بەڕێوەبردنی وڵات، بۆیە دڵخۆش نیم، دەبێت دامەزراوەکان راستەقینە بن، ئەمە ئەوەیە کە ئێمە کێشەمان هەیە لەگەڵیدا.
بۆ بابەتی پەیوەندییەکانی هەرێم و بەغداد و چۆنیەتی باشتر بەڕێوەبردنی ئەو پەیوەندییانە، سەرۆک بافڵ وتی: لە راستیدا داری سیحریمان نییە بۆ چارەسەرکردنی کێشەکان، ئەو شتەی کە ئێمە بەردەوام نایکەین، ئەوەیە ئێمە ئیمزا لەسەر دۆکیۆمێنتەکان دەکەین و جێبەجێ ناکرێن، ئەوە یەکێکە لەو شتانەی دەبێت چارەسەری بکەین، بۆ نموونە رێککەوتنی بودجە، لە یەکەم رۆژەوە کە رێککەوتننامەکەیان پیشانداین هەمووان دڵیان خۆش بوو، تەنها من نەبێت، وابزانم بەڕێز سودانی سەرۆک وەزیران پرسیی وتی: تۆ بۆچی دڵخۆش نیت؟ وتم: بەڕێزم جگە لەتۆ کەس ئەو شتە ناکات، بۆچی ئیمزام کردووە؟ با دیالۆگێکی راستەقینەمان هەبێت، بۆئەوەی بگەین بە رێککەوتنێک و بەشێوەیەکی راستەقینە جێبەجێی بکەین دوور لەو کێشانەی کە لەنێوان کەسەکاندا هەیە، ئەمەش شێوازێکی هەڵەیە، دووبارەی دەکەینەوە، چونکە ئەمانە لە رێگەی دامەزراوەکانەوە چارەسەر دەکرێن، دامەزراوەیەک مامەڵە لەگەڵ دامەزراوەیەکی دیکەدا بکات، نەک کەسێک لەگەڵ کەسێکی تردا، بۆیە پێموایە ئەوکاتە کارەکان ئاسانتر دەبن.
سەبارەت بە کۆسپە سیاسییەکانی بەردەم رێککەوتنی بەغداد و هەولێر، سەرۆک بافڵ ئاماژەی بەوەدا: ئیمزاکردنی رێککەوتننامەکەی هەناردەکردنەوەی نەوت و هاتنی پارە ئەوە شتێکی باشە، وابزانم چانسێکی باشیش هەیە لە هەرێمی کوردستان کە وایکردووە کورد یەکڕیزتر بێت، بۆئەوەی مامەڵە لەگەڵ بەغداد بکەین،  بۆیە من زۆر خۆشحاڵم سەبارەت بەو هەڵبژاردنانەی لە بەغدا ئەنجام دەدرێن و ئەوەشی لە هەموو عیراقدا روودەدات.
دەربارەی رێژەی بەشداریکردنی خەڵک لە هەڵبژاردنی ئەمجارەشدا، وتی: لە راستیدا من نیگەرانی ئەوە نیم، بەڵکو من نیگەرانم لە ترساندن، من تەماشای ژەمارەکان دەکەم، هەندێک گروپ دەبینیت دەنگیان بەدەستهێناوە لە ناوچەی سەدام-دا، ئاساییە بە یەکێکیان وتبێت ناوی خۆت لەوێ دابنێ، دەنا لە هەموو شوێنێکی دنیا شتی وا هەیە، لە ئەمریکاش لە هەڵبژاردنەکاندا لە هەندێک ناوچە رێژەی دەنگدان کەمە. لە راستیدا نیگەرانبوون زیاتر لە دابەزینی رێژەی دەنگدان، نیگەرانییە لەو پارە زۆرەی هەڵدەڕێژرێت. لە هەندێک وڵاتی جیهان پارە هەڵدەڕێژرێت لەلایەن هەندێک پارتی سیاسی و گروپەوە، ئەوەش کارێکی شوورەیی و شەرمەزارییە، بە شانازییەوە دەتوانم ئەوە بڵێم یەکێتیی نیشتمانیی کوردستان یەک دۆلاری لە هیچ وڵاتێک وەرنەگرتووە و وەریشی ناگرین، دەبێت واشبێت، کاتێک چووم بۆ بەغداد سەرنجی شتێکمدا کە رەنگە لای کەسانی دیکەش سەرنجڕاکێش بێت، بەغداد و عیراق پێویستیان بەچییە؟ ئەوێ پێویستی بە گۆڕینی میزاجە، هۆکارێک هەیە کە وادەکات 70 ٪ی دانیشتووانی عیراق بەشداریی نەکەن لە هەڵبژاردنەکاندا، هۆکارەکەی دەگەڕێتەوە بۆ ئەوەی ئەوان خۆشحاڵ نین بەم بارودۆخە، عیراق وڵاتێکی گەورە و مەزنە، شوێنی شارستانییەت و ماتماتیک و گەردوونناسی و زۆر شتی ترە، عیراق لەسەروو هەموو شتێکەوە ئەوەی کە پێویستی پێیەتی، بزووتنەوەیەکی نیشتمانیی عیراقی و وڵاتێکی سەربەخۆی خاوەن کاریگەرییە، ئەمەش ئەوە ناگەیەنێت کە هاوبەشیمان نەبێت لەگەڵ وڵاتانی دیکەدا، بەڵام دەبێت بڕیاری سیاسی لە عیراقدا سەربەخۆ بێت، دەشبێت بڕیارەکانی بۆ خەڵکی عیراق بێت و لەلایەن عیراقییەکانەوە بڕیارەکە بدرێت و بۆ عیراقییەکانیش بێت، هەرکاتێکیش ئەوە روویدا، هەموو شتێک لە عیراق بەرەوپێشەوە دەچێت و ئەوکاتە چیتر 70 ٪ی عیراقییەکان لەماڵەوە دانانیشن و دەشچن دەنگ دەدەن.
لە وەڵامی پرسیارێکدا ئاخۆ یەکێتی کاراکتەری نادەوڵەتیی هەیە وەک هێزی چەکدار لە دەرەوەی وەزارەتی پێشمەرگە، سەرۆک بافڵ وتی: نەخێر ئێمە نیمانە، وەکو کێ؟ وەزارەتی پێشمەرگە هێشتا یەکگرتوو نییە، ئێمە هێزی 70 -مان هەیە و ئەو هێزانەش دانپێدانراون و هێزێکی رەسمین و لەلایەن عیراق و ئەمریکاوە بەشداریی مەشق و راهێنانیان پێکراوە، بۆیە نازانم باسی کامە کارەکتەری نادەوڵەتی دەکەیت؟
سەبارەت بە بارودۆخی ئێستای سوریاش، وتی: هەسەدە هێزێكی واقیعبینە و پێویستە دیمەشقیش خۆی كۆبكاتەوە و دەبێت كارێك بكرێت ئەمنییەتی سوریا بەگشتی بپارێزرێت و ناوچە كوردییەكانیش جۆرێك لە مافی ئۆتۆنۆمییان هەبێت و زمان و كەلتورەكەیان بەڕەسمی بناسێنرێت و جۆرێك لە هاوبەشیی ئەمنی هەبێت بۆ پاراستنی كوردەكان و ئاوێتەبوون و تێكەڵاوبوون هەبێت و سوریاش وەك دەوڵەت پێویستی بە پرۆژەیەكی نیشتمانییانە هەیە بۆ ئەوەی سەركەوتووبێت و پێویستیشە هەموو لایەنەكان بەتایبەتی كورد لەو وڵاتەدا دانیان پێدا بنرێت و مافەكانیان پارێزراوبێت و نابێت لەبیربكرێن، نەك وەك ئەوەی لە چەند رۆژی رابردوودا لەو وڵاتە كرا بەناوی هەڵبژاردنەوە، كە هەڵبژاردن نەبوو. 
ئەوەشی وەك یەكێتیی نیشتمانیی كوردستان بە پێگە بەهێزەكەی دەیەوێت لەو وڵاتەدا بیكات یان بۆ ئەو وڵاتە بكرێت، نێوەندگیرییە بۆ نزیكبوونەوە و چارەسەركردنی كێشەكان، ئێمە پەیوەندییەكی باشمان لەگەڵ هەموو وڵاتاندا هەیە، ئەو پەیوەندییەشمان بەكارهێناوە بۆ باشكردنی دۆخی سوریا بەگشتی، دەمانەوێت هەمووان بە مافەكانی خۆیان بگەن، ئێمە پەیوەندیی ناوازەمان هەیە لەگەڵ كوردانی سوریادا، مەزڵوم عەبدی یەكێكە لە هاوڕێ هەرە نزیكەكانی خۆم، بۆیە هەرچیمان پێبكرێت درێغی ناكەین لە هاوكاریكردنیان و بڕوامان وایە ئەوان شایانی باشترینن و لە دواهەمین دیداریشمدا لەگەڵ مەزڵوم عەبدی، یەكێك لەو بیرۆكانەی من كە بەڕێزیان بەدڵی بوو، ئەوەبوو سوودوەربگرن لە هەموو هەلێك بۆ ئەوەی بگەنە رێكەوتنێك لەگەڵ سوریادا و واقیعیانە مامەڵە بكرێت لەگەڵ بارودۆخەكاندا و كارێك بكەن جێنەمێنن لەگەڵ بەرەوپێشچوونەكاندا و بڕواشم وایە سوریا پێویستی بە جۆرێك لە جۆرەكانی سیستمی لامەركەزییە و ئەوەش شتێكی روونە.
لەبارەی پرسی ئاشتیش لە توركیا، سەرۆك بافڵ، باسی لەوەكرد كە دەبێت گەشبین بین وەك چۆن سەرۆك تاڵەبانی گەشبین بوو لەوبارەیەوە، بە سروشتی ئێمە گەشبینین، پرسەكە لە هەموو لایەنەكانەوە بڕیاری لێدراوە، وردەكارییەكانی پرسەكە ئاڵۆزن، ئەوەش كاتی پێویستە، چەند هەنگاوێك هەن دەبێت بنرێن بۆ سەركەوتنی، هەموو ئەوانەی ئێمە قسەمان لەگەڵ كردوون بۆچوونیان باشە لەسەر پرسی ئاشتی لە توركیا و بەڕێز عەبدوڵڵا ئۆجەلان-یش قسەی خۆی كردووە و بڕیاریداوە لەبارەی چەكدانانی پەكەكەوە.
تایبەت بە ئێران و رۆڵ و كاریگەریی بەشێك لە هێزەكان لە رۆژهەڵاتی ناوەڕاست و ناوچەكەدا بەتایبەتی دوای شەڕ و پێكدادان و ئاڵۆزییەكانی ماوەی رابردوو، سەرۆكی یەكێتی، رایگەیاند: دەكرێت بڵێین رۆڵ و پێگەی هەندێك هێز لە بەشێكی وڵاتاندا لاوازبوون، بەڵام ئەوە ناكاتە ئەوەی بڵێیت پێگەی وڵاتان بەتەواوی لاوازبوون بەتایبەتی پێگەی عیراق و ئێران. وتیشی: من بە وردی تەماشای شەڕی 12 رۆژەی ئێران و ئیسرائیلم كرد، بینیمان زیان بە ناوەندە سەربازییەكان و كارگە و سەرچاوە پیشەسازییەكان كەوت، بەڵام پێگەی وڵاتەكان لاوازنەبوون و لەسەر پێی خۆیان وەستان، كەم وڵات هەیە لە جیهاندا، نەك لە رۆژهەڵاتی ناوەڕاست، تەنانەت لە ئەوروپاش، ناتوانن بەرگەی بارودۆخەكان بگرن وەك ئەوەی ئێران بەرگەی گرت و بەبەهێزی مایەوە و وایكرد خەڵكی وڵاتەكە زیاتر یەكگرتوو و رێكخراوتر بن. دڵنیام هیچ وڵاتێك لەناوچەكەدا نایەوێت شەڕ رووبدات و زیان بە دامەزراوەكانی بگات، ئەوەی من گوێبیستی بووم لە ئێرانییەكان ئەوەیە كەسایەتییە گەورەكانیان زۆر نیگەرانن لەوەی جارێكی تر جەنگ دروستببێتەوە، بەبەردەوامی ئەوە دەڵێن كە حەزیان بە دروستكردنی چەكی ئەتۆمی نییە، ئێرانییەكان دەیانەوێت و مەبەستیانە بزانن ئەنجامی وتووێژەكان چی دەبێت، دەیانەوێت بزانن ئەوەی روودەدات پەیوەندیی بە چییەوە هەیە و داواكارییەكان چین. ئەوەی من دەیزانم ئەوەیە هەموو لایەكیان دەیانەوێت دەست بە گفتوگۆ بكەنەوە. هیواداریشم عیراق دووربخرێتەوە لە مەترسییەكان و دەستتێوەردان نەكرێت لە كاروبارەكانیدا، وڵاتانی خۆرئاوا بەشێوەیەكی قووڵ لە پەیوەندییەكانی نێوان عیراق و ئێران تێنەگەیشتوون، تەنانەت لەلایەنی كەلتورییشەوە، هەر تاكێكی سیاسی لە تەمەنێكی دیاریكراودا لە عیراق، تەنانەت كاك مەسعود بارزانی و چەندین كەسی دیكە، كە نەیاری سەدام بوون و رووبەڕووی رژێمەكەی وەستانەوە، چوونە ئێران و لەو وڵاتە ژیانیان بەڕێدەكرد، ئەوەش بەشێکی هۆكاری پەیوەندییەكانی ئێستای نێوان عیراق و ئێرانە، ئەو پەیوەندییانەش بەو مانایە نایەت كە ئێران بەرپرسی سیاسەتەكانی عیراق بێت، ئێمە خاوەنی خۆمانین و عیراق هی عیراقییەكانە. ئەوەشی ئێمە لە عیراق جەختی لەسەر دەكەینەوە ئەوەیە كێشەكان چارەسەربكرێن و پەنا نەبرێتە بەر جەنگ و كاولكاری، ئەو كۆبوونەوە و گفتوگۆیانەی ئێمە لەگەڵ ئەمریكییەكان هەمانبووە زۆر ئەرێنی بووە، بەرچاوڕوونی زیاتر لەنێوانماندا هەیە، ئیدارەی ئێستای دۆناڵد ترەمپ ئاشتی دەوێت، ترەمپ بیركردنەوەی جیاوازە، ناترسێت لە بڕیاردان و ئاشتیی دەوێت لە جیهاندا و كەسێكی بوێرە، من وایدەبینم بیركردنەوەی دۆناڵد ترەمپ بەو شێوەیە بێت كە بڕیاردان زۆر باشترە لە بڕیارنەدان، هەندێكجار بڕیارنەدان وادەكات دواجار بارودۆخێكی خراپتر دروستببێت بۆ بڕیاردان.